नागपूर - जुन्या वादातून एका भंगार व्यावसायिकाने मुलगा व जावयाच्या मदतीने 32 वर्षीय तरुणास जबर मारहाण केल्याची घटना नागपुरात घडली आहे. या मारहाणीचा संपूर्ण प्रकार सीसीटीव्हीत कैद झाला आहे. मारहाण करणाऱ्या आरोपींना पोलीस वाचवत असल्याचा आरोप पीडित तरुणाने केला आहे.
नागपूरच्या अजनी पोलीस ठाण्याच्या हद्दीतील रामटेकेनगर परिसरात विक्की गोडघाटे या तरुणाचा फोटो स्टुडिओ आहे. फोटो स्टुडिओच्या शेजारी पाटील नावाच्या व्यक्तीचे भंगाराचे दुकान आहे. विक्की व पाटील यांच्यात जुना वाद होता. विक्की हा दुचाकीवरून दुकानातून बाहेर पडला. दरम्यान, त्याच रस्तावर अमोल पाटील समोर आला. कार आडवी लावून आरोपीने विक्कीचा रस्ता रोखला. त्यावेळी दोघामध्ये शाब्दिक वाद निर्माण झाला. वादामुळे आरोपी अमोल पाटील कारमधून बाहेर आला व विक्कीला मारहाण करण्यास सुरुवात केली.
यावेळी अमोलचे वडील रतन पाटील देखील आले. त्यांनीही लाकडी दांड्याने विक्कीला मारहाण केली. मारहाणीचा वेळी रतन पाटील यांच्या मुलीने देखील मारहाण केली आहे. या मारहाणीची घटना सीसीटीव्हीत चित्रित झाली आहे. मारहाणीच्या या प्रकारानंतर विक्की अजनी पोलीस ठाण्यामध्ये तक्रार करण्यास गेला. मात्र, पोलिसांनी तक्रार घेण्यास नकार दिल्याचा आरोप विक्की गोडघाटे याने केला आहे. वरिष्ठ पोलीस अधिकाऱ्यांच्या निदर्शनास ही बाब आणून दिल्यावरही स्थानिक पोलिसांनी केवळ थातूर मातूर कारवाई केल्याचा आरोपही पीडित तरुणाने केला आहे.
