नागपूर - नागपूर जिल्हा कोरोनाच्या तिसरी लाटेच्या उंबरठ्यावर उभा असल्याचा दावा पालकमंत्री नितीन राऊत यांनी केला होता. त्यानंतर अवघ्या २४ तासात रुग्ण संख्या १८ ने वाढली आहे. गेल्या दोन महिन्यांपासून रुग्ण संख्या एकेरी आकड्यात येत असताना आज अचानक १८ रुग्ण पुढे आले आहेत. यात १० वैद्यकीय शिक्षण घेणाऱ्या विद्यार्थ्यांचा समावेश असल्याने खळबळ उडाली आहे.
हेही वाचा - 15 सप्टेंबर ते 10 ऑक्टोबर दरम्यान सीईटी परीक्षा होणार - मंत्री सामंत
नागपूर जिल्ह्यातील हिंगणा तालुक्यामधील दत्ता मेघे मेडिकल कॉलेजमधील दहा विद्यार्थी कोरोनाबाधित असल्याचं समोर आलं आहे. कोरोनाबाधित आढळलेल्या दहा विद्यार्थ्यांमध्ये नऊ विद्यार्थिनी तर एक विद्यार्थ्याचा समावेश आहे. हे सर्व एमबीबीएसच्या पहिल्या वर्षाचे विद्यार्थी असून कॉलेज परिसरातील हॉस्टेलमध्येच राहात होते. दहा विद्यार्थी कोरोनाबाधित आढळल्यानंतर सर्वांना मेडिकल कॉलेजला संलग्न असलेल्या शालिनीताई मेघे रुग्णालयात दाखल करण्यात आले असून सर्वांची प्रकृती सामान्य असल्याची माहिती पुढे आली आहे.
- संपर्कात आलेले सर्व विलगीकरण मध्ये -
वैद्यकीय शिक्षण घेणाऱ्या १० विद्यार्थी कोरोनाबाधित असल्याची माहिती पुढे येताच,त्या दहा विद्यार्थ्यांचे संपर्कातील सुमारे पन्नास विद्यार्थ्यांना विलगीकरणात ठेवण्यात आले आहे. या शिवाय हॉस्टेलमध्ये राहणाऱ्या उर्वरित सर्व विद्यार्थ्यांची कोरोना चाचणी करण्याचा निर्णय घेण्यात आला आहे.
- एकूण रुग्ण संख्या -
आज नागपूर शहरात आणि जिल्ह्यात तब्बल १८ कोरोना पॉझिटिव्ह रुग्ण आढळून आले आहेत. यामध्ये शहरातील ८ आणि ग्रामिण नागपूरमध्ये १० रुग्णांचा समावेश आहे. त्यामुळे एकूण सक्रिय रुग्णांची संख्या ही ६५ पर्यंत गेली आहे. आज शहरात ४५३४ चाचण्या करण्यात आल्या आहेत.
हेही वाचा - राज्यात निर्बंध लावण्यासंदर्भातील चर्चा अद्याप नाही; मंत्री वडेट्टीवार यांचे स्पष्टीकरण
