नागपूर : आगामी काळात राज्यात अनेक महानगरपालिका, नगर पालिका आणि जिल्हा परिषदांसह स्थानीक स्वराज्य संस्थाच्या निवडणुका होऊ घातल्या आहेत. या निवडणुकांमध्ये जास्तीत-जास्त महाविकास आघाडीचे उमेदवार निवडून येतील अशा प्रकारच्या प्रभाग रचना आणि गट तयार करण्यात आले आहेत असा गंभीर आरोप केला आहे भाजप नेते आणि विधानपरिषद आमदार चंद्रशेखर बावनकुळे यांनी ते आज नागपुरात पत्रकार परिषदेत बोलत होते.
जाणीवपूर्वक अधिकाऱ्यांवर दबाव : अधिकाऱ्यांवर दबाव आणून जाणीवपूर्वक सदोष प्रभाग रचना तयार करण्यात आली असल्याचा आरोप त्यांनी केला आहे. या विरोधात निवडणूक आयोगाला पत्र पाठवण्यात आले असून पुन्हा नव्याने प्रभाग रचनेची तपासणी करावी आणि जनतेच्या हरकतींची सूनवाई व्हावी अशी मागणी केल्याची माहिती त्यांनी दिली आहे.
जिल्हा परिषद निवडणुकीत आघाडीचे निर्णय चुकीचे : राज्य निवडणूक आयोग यांच्या आदेशानुसार भारतीय संविधानाच्या अनुच्छेद 243 के आणि महाराष्ट्र जिल्हा परिषदा व पंचायत समित्या अधिनियम 1961 मधील तरतुदीनुसार जिल्हा परिषद पंचायत समिती यांची गट व गण रचना करण्यात येते. तसेच भारतीय संविधानाच्या अनुच्छेद 243 झेड ए मधील तरतुदीनुसार महानगरपालिका नगरपरिषदा नगरपंचायती आणि निवडणूक प्रभाग रचना केल्या जात असते. त्याच प्रकारे महाराष्ट्र ग्रामपंचायत अधिनियम नुसार ग्रामपंचायत वॉर्ड रचना करण्यात येते. या प्रभाग व वॉर्ड रचना तयार करताना महाराष्ट्र विकास आघाडी शासनाने नियमांना डावलून महानगरपालिका, नगरपरिषद, नगरपंचायत, जिल्हा परिषद, गट गण रचना चुकीने तयार केल्याचे निदर्शनास आल्याचा आरोप चंद्रशेखर बावनकुळे यांनी केला आहे.
शेख हुसेनवर कारवाई झालीच पाहिजे : पंतप्रधान नरेंद्र मोदी यांच्या संदर्भात आक्षेपार्ह विधान केल्याप्रकरणी काँग्रेसचे नेते शेख हुसेन विरुद्ध भारतीय जनता पक्षाचे नेत्यांनी तक्रार दिली होती. मात्र,पोलिसांनी त्यावेळी हे शेख हुसेनवर कोणतीही कठोर कारवाई केली नाही त्या विरोधात आज भारतीय जनता पक्षाचे नेते पुन्हा एकदा शहर पोलीस आयुक्त अमितेशकुमार यांची भेट घेऊन शेख हुसेन वर कारवाई करण्यात यावी अशी मागणी करणार असल्याची माहिती चंद्रशेखर बावनकुळे यांनी दिली आहे. पोलिसांनी शेख हुसेन विरुद्ध कारवाई न केल्यास न्यायालयात दाद मागणार असल्याचा देखील बावनकुळे म्हणाले आहेत.
हेही वाचा : Shinzo Abe : सभा सुरु असतानाच जपानच्या माजी पंतप्रधानांवर गोळीबार.. छातीत घुसल्या गोळ्या.. प्रकृती चिंताजनक
