नागपूर - बहुमत सिद्ध करण्याच्या वेळी शिवसेनने फारकत घेतली, तरच पुढच्या राजकारणाचा विचार केला जाईल, असे वक्तव्य काँग्रेसचे प्रदेश कार्यध्यक्ष नितीन राऊत यांनी केले आहे. सेना- भाजपमध्ये सरकार स्थापनेवरुन सुरू असलेले राजकारण महाराष्ट्राच्या हिताचे नसून, जोपर्यंत सेना यातून बाहेर पडत नाही; तोपर्यंत काँग्रेसला यामध्ये कोणताही रस नसल्याचे राऊत यांनी म्हटले.
अद्याप आमच्याकडे सेनेकडून कोणताही प्रस्ताव आलेला नसून, उभयतांमध्ये चर्चा होईपर्यंत आम्हाला पुढचे पाऊल टाकता येणार नसल्याचे त्यांनी स्पष्ट केले. सेना व काँग्रेसच्या विचारसरणीत अंतर असल्याचेही राऊत यांनी अधोरेखित केले आहे.
विधानसभेचे विरोधी पक्षनेते पद राष्ट्रवादीकडे जाणार असल्याने विधान परिषदेत विरोधी पक्षनेता काँग्रेसचा असला पाहिजे, अशी मागणी त्यांनी यावेळी केली आहे.
तसेच परतीच्या पावसामुळे शेतकऱ्यांच्या पिकांचे झालेल्या नुकसानीचाही त्यांनी यावेळी उल्लेख केला. तसेच शेतकऱयांना तत्काळ मदत पुरवण्याची मागणीही त्यांनी केली.
