मुंबई - घराबाहेर खेळणाऱ्या एका १० वर्षांच्या मुलाला शेजाऱ्याने मारल्याचा जाब विचारला असता २ कुटुंबांमध्ये हाणामारी झाली. हा वाद विकोपाला जाऊन मुलाच्या आईवर एका तरुणाने चाकूने वार करून जखमी केले आहे. याप्रकरणी मानखुर्द पोलिसांनी दोन पुरुषांसहित दोन महिलांना अटक केली.
खारघर नवी मुंबई येथील रहिवासी पूनम टाक या आपल्या 10 वर्षाच्या मुलासह मानखुर्द येथे नातेवाईकाकडे आल्या होत्या. पूनम टाक यांचा मुलगा घराबाहेर खेळत होता. यावेळी शेजारी राहणाऱ्या अमित कजानिया याने मुलाला मारल्याने तो रडत घरी आला. यावेळी पूनम यांनी का मारले विचारायला गेले असता दोन कुटुंबात जोरदार भांडण सुरू झाले.
धक्काबुक्की चालू असताना आरोपी अमित घरात गेला आणि चाकू आणून पूनम यांच्या डोक्यावर वार केला. या हल्ल्यात त्या जखमी झाल्या. त्यानंतर जखमी पुनम यांना गोवंडीच्या शताब्दी रुग्णालयात दाखल करण्यात आले. घटनेची माहिती मिळताच मानखुर्द पोलीस घटनास्थळी दाखल झाले.
या प्रकरणी मानखुर्द पोलिसांनी अमित कजानिया, रवी कजानीया व अमितच्या कुटुंबातील दोन महिला राजेन्द्री कजानिया, मधू कजानिया यांना अटक केली आहे. पुढील तपास मानखुर्द पोलीस करीत आहेत.
