मुंबई - ईडीच्या आडून भाजप सूडाचे राजकारण करत असून ही गंभीर बाब आहे, असे मत गृहमंत्री अनिल देशमुख यांनी माध्यमांशी बोलताना व्यक्त केले. नव वर्षाचे स्वागत करताना जमावबंदी आदेश लागू आहेत, त्याचे पालन करा, असेही देशमुख यांनी आवाहन केले आहे.
भाजपा विरोधात बोलल्यास इडीची नोटीस -
भाजप नेत्यांच्या विरोधात किंवा धोरणाविरोधात बोलल्यावर लगेच ईडीची नोटीस पाठवण्यात येते. हेच काम सुरुवातीला सीबीआय करत होते. परंतु राज्यात चौकशी करायची असेल तर राज्यसरकारची परवानगी घ्यावी लागेल, असा निर्णय राज्य सरकारने घेतला. त्यामुळे सीबीआयबाबत आता केंद्र काही करु शकत नाही, अशी माहितीही अनिल देशमुख यांनी दिली. ईडीचा ज्यापध्दतीने राजकारणासाठी वापर होतोय. ते पाहून अशा प्रकारचं राजकारण देशात कधी पाहण्यात आले नाही, अशी खंतही अनिल देशमुख यांनी व्यक्त केली.
जमावबंदी आदेशाचे पालन करा -
कोरोनाच्या पार्श्वभूमीवर राज्यात जमावबंदी लागू केली आहे. एका जागी पाच पेक्षा जास्त लोकांना एकत्र जमण्यास बंदी आहे. त्यानंतरही लोक जमतात अशा ठिकाणी गर्दी होत आहे. उद्या नव वर्षांचे स्वागत करताना जमावबंदी आहे, एका ठिकाणी पाच पेक्षा जास्त लोक एकत्र येऊ शकत नाही या नियमांचे पालन करा असे आवाहन गृहमंत्री अनिल देशमुख यांनी केले आहे.
