मुंबई - औषध व्यावसायिक उमेश कोल्हे ( Umesh Kolhe Murder Case ) यांची गळ चिरुन 21 जूनला हत्या करण्यात आली होती. कोल्हे यांच्या खूनामागे नूपूर शर्मा प्रकरणाचा वाद आहे का? याबाबत सखोल चौकशीअंती हा खून नुपूर शर्मा प्रकरणातूनच झाला असल्याचा खुलासा अमरावती पोलिसांनी केला आहे. याच प्रकरणात सतत नवनवीन खुलासे होत आहेत. त्यावरती आता उपमुख्यमंत्री देवेंद्र फडणवीस यांनी आपले मत व्यक्त केलं आहे. या घटनेतील मुख्य आरोपीला अटक करण्यात आली आहे. तरीदेखील त्याच्यामागे काही विदेशी ताकद आहे का?, याची सुद्धा चौकशी केली ( Umesh Kolhe Murder Case International Connection Inquiry ) जाणार असल्याचे उपमुख्यमंत्री फडणवीस ( DCM Devendra Fadnavis ) यांनी म्हटलं आहे.
विधानभवनाबाहेर देवेंद्र फडणवीस यांनी प्रसारमाध्यमांशी संवाद साधला. ते म्हणाले, उमेश कोल्हे यांची झालेली हत्या ही फार गंभीर घटना आहे. ज्या कारणाने त्यांना मारण्यात आलं, ते अतिशय निंदणीय आहे. या घटनेतील आरोपी त्याचबरोबर त्याचा मास्टरमाइंड हा पकडला गेला आहे. तरीसुद्धा याच्यामागे काही विदेशी ताकद आहे का? याची सुद्धा चौकशी होणार आहे. सुरुवातीला या प्रकरणाला दरोड्याचं कारण देण्यात आलं होतं. तशा प्रकारच्या बातम्या पसरवल्या गेल्या होत्या. परंतु, या प्रकरणात अजूनही पूर्ण चौकशी करण्याची गरज असल्याचं उपमुख्यमंत्र्यांनी स्पष्ट केलं.
मुख्य आरोपीला पोलीस कोठडी - उमेश कोल्हे हत्या प्रकरणात शेख इरफान शेख रहीम हाच मुख्य सूत्रधार असल्याचे पोलिसांचे म्हणणे आहे. आज ( 3 जुलै ) पोलिसांनी न्यायालयासमोर हजर केले. या प्रकरणाचा सखोल तपास व्हावा या दृष्टीने न्यायालयाने शेख इरफान शेख रहीम याला सात जुलैपर्यंत पोलीस कोठडी ठेवण्याचे आदेश दिले आहे.
मुख्य आरोपीच्या संस्थेची होणार चौकशी - शेख इरफान शेख रहीम हा एका स्वयंसेवी संस्थेचा पदाधिकारी असल्याचे समोर आले. या संस्थेची देखील चौकशी केली जाणार आहे. या प्रकरणासाठी या संस्थेच्या वतीने किंवा इतर कुठून शेख इरफान शेख रहीम याला आर्थिक पुरवठा झाला का? याचा तपास देखील केला जाणार आहे. या हत्या प्रकरणात वापरण्यात आलेल्या दुचाकी, एक कार देखील जप्त करण्याचे आदेश न्यायालयाने दिले असल्याची माहिती कोल्हे कुटुंबीयांचे वकील पंकज तामने यांनी दिली आहे. या प्रकरणात कोल्हे कुटुंबीयांच्या वतीने वकील पंकज तामने यांच्यासह गायत्री दाणी आणि महेश देशमुख काम पाहत आहेत.
काय आहे प्रकरण? - शहरातील उमेश कोल्हे ( रा. घनश्यामनगर ) या मेडिकल व्यावसायिकाची चाकून गळा चिरुन हत्या करण्यात आली होती. 21 जून रोजी ही धक्कादायक घटना घडली होती. कोल्हे यांचे तहसील कार्यालय परिसरात मेडिकल स्टोअर्स आहे. मंगळवारी रात्री त्यांनी मेडिकल स्टोअर्स बंद केले. त्यानंतर ते मुलगा संकेत (२७) व सून वैष्णवी यांच्यासोबत घरी जायला निघाले. समोर एका दुचाकीवर उमेश तर मागे दुसऱ्या दुचाकीवर मुलगा संकेत व त्यांची पत्नी वैष्णवी जात होते. न्यू हायस्कूल मेन समोरील गल्लीतून जात असताना एका दुचाकीजवळ तीन जण उभे होते. त्यातील एकाच्या हातात चाकू होता. ते तिघेही अचानक उमेश यांच्या दुचाकीच्या आडवे झाले.
तिघांपैकी एकाने केला गळ्यावर वार - त्यामुळे उमेश यांनी दुचाकी थांबविली. यावेळी काही कळण्याआधीच तिघांपैकी एकाने चाकूने उमेश यांच्या गळ्यावर वार केला तर ईतरांनीही मारहान करण्यास मदत केली. त्यामुळे उमेश हे दुचाकीसह खाली कोसळले. हा प्रकार त्यांच्या मागे येत असलेल्या मुलगा संकेत व सून वैष्णवी यांच्या लक्षात आल्यावर त्यांनी दुचाकी थांबवून आरडाओरड केली. त्यामुळे तिनही मारेकरी दुचाकीने तेथून पळून गेले. त्यानंतर संकेत व वैष्णवी यांनी परिसरातील नागरिकांच्या मदतीने उमेश यांना खासगी रुग्णालयात दाखल केले. परंतु, उपचारादरम्यान काही वेळातच उमेश यांची प्राणज्योत मालवली. त्यानंतर घटनेची माहिती कोतवाली पोलिसांना देण्यात आली.
'या' आरोपींना अटक - या प्रकरणी पोलिसांनी अतिफ राशीद आदिल रशीद ( वय, २४ रा. मौलाना आझाद कॉलनी), मुदस्सीर अहेमद शेख इब्राहिम ( वय २२, रा. बिसमिल्लानगर ), शाहरूख पठाण हिदायत खान ( वय२४, रा. सुफियाननगर), अब्दुल तौफिक उर्फ नानू शेख तसलिम ( वय, २४ रा. बिसमिल्लानगर ) आणि शोएब खान उर्फ भुऱ्या वल्द साबीर खान (वय २२, रा. यास्मीननगर ), युसूफ खान बहादूर खान (44) आणि शेख इरफान शेख रहीन ( वय, 35 ) असं अटक केलेल्या सात व्यक्तींच नावं आहे.
हेही वाचा - Umesh Kolhe Murder Case : उमेश कोल्हे हत्या प्रकरण; मुख्य आरोपीला सात जुलैपर्यंत पोलीस कोठडी
