मुंबई - केंद्राच्या नव्या शेतकरी कायद्याविरोधात दिल्लीच्या वेशीवर पंजाब हरियाणा येथील शेतकरी गेल्या काही दिवसांपासून आंदोलन करत आहेत. केंद्राने केलेल्या नव्या कायद्यांविरोधात शेतकऱ्यांमध्ये असंतोष आहे. या पार्श्वभूमीवर कायद्याला विरोध करण्यासाठी येत्या 3 जानेवारीला महाराष्ट्रातून हजारो शेतकरी दिल्लीला जाणार असल्याची माहिती अखिल भारतीय किसान संघर्ष समन्वय समिती व महाराष्ट्र राज्य किसान सभा यांच्यावतीने पत्रकार परिषदेमध्ये देण्यात आली आहे.
केंद्राच्या विरोधात शेतकरी एकवटले
26 नोव्हेंबरपासून दिल्लीच्या बॉर्डरवर देशातील शेतकरी ठाण मांडून बसले आहेत. केंद्राने मंजूर केलेले तीन नवे कृषी कायदे हे शेतकऱ्यांवर अन्याय करणारे आहेत. त्यामुळे सरकारने तातडीने हे कायदे मागे घ्यावेत. एम एस पी कायदा रद्द करावा अशा विविध मागण्या या शेतकऱ्यांच्या वतीने करण्यात आल्या आहेत. गेल्या एक महिन्यांपासून दिल्लीमध्ये केंद्र सरकारच्या विरोधात शेतकऱ्यांचे आंदोलन सुरू आहे. आता राज्यातून देखील हजारो शेतकरी या आंदोलनाला पाठिंबा देण्यासाठी 3 जानेवारीला दिल्लीमध्ये जाणार आहेत.
शेतकरी नेत्यांकडून शेतकऱ्यांना मार्गदर्शन
महाराष्ट्रातून शेतकरी दिल्लीला जाण्याअगोदर नागपूर येथे शेतकऱ्यांना शेतकरी नेत्यांच्या वतीने मार्गदर्शन करण्यात येणार आहे. त्यानंतर शेतकरी दिल्लीच्या दिशेने रवाना होतील. मुंबई, ठाणे, पालघर, रायगड, पुणे अहमदनगर, नाशिक येथून दोन जानेवारीला शेतकरी नागपूरला दाखल होणार आहेत. आणि त्यानंतर ते दिल्लीला जातील अशी माहिती कॉम्रेड प्रकाश रेड्डी यांनी दिली आहे.
शेतकरी करणार कायद्याविरोधात जनजागृती
महाराष्ट्रातील विविध जिल्ह्यातून निघणारे शेतकरी नागपूरला पोहोचून पुढे इंदोर, कोटा, जयपूर मार्गे दिल्लीमध्ये सुरू असलेल्या मुख्य आंदोलनामध्ये सहभागी होतील. वाटेत येणाऱ्या शहरांमध्ये या शेतकऱ्यांच्यावतीने सभा आणि मिरवणुकीच्या माध्यमातून जनजागृती देखील करण्यात येणार आहे. या आंदोलनात शेतकरी संघटना, आयटक कामगार संघटना व विविध सामाजिक संघटना सहभागी होणार असल्याची माहिती गावडे यांनी दिली आहे.
