लसींचा तुटवडा : 30 लसीकरण केंद्र बंद, आज ही केंद्र बंद पडणार!

केंद्र सरकारकडे मागणी करूनही लसींचा साठा उपलब्ध न झाल्याने तसेच पुढील साठा 15 एप्रिलला येणार असल्याने मुंबईत 120 पैकी खासगी 25 आणि पालिकेच्या 5 अशा एकूण 30 केंद्रांवर गुरुवारी लसीकरण बंद झाले आहे.

मुंबई : मुंबईत कोरोनाचा प्रसार रोखण्यासाठी लसीकरणाला सुरुवात झाली आहे. मात्र केंद्र सरकारकडे मागणी करूनही लसींचा साठा उपलब्ध न झाल्याने तसेच पुढील साठा 15 एप्रिलला येणार असल्याने मुंबईत 120 पैकी खासगी 25 आणि पालिकेच्या 5 अशा एकूण 30 केंद्रांवर गुरुवारी लसीकरण बंद झाले आहे. पालिकेची 33 पैकी 5 केंद्र बंद झाली आहेत. आजही बहुसंख्य केंद्र बंद होणार आहे. त्यामुळे मुंबईतील लसीकरण ठप्प होणार आहे.
लसीकरण होणार ठप्प
मुंबईत गेल्या वर्षीच्या मार्च महिन्यात कोरोना विषाणूचा प्रसार सुरू झाला. कोरोनाचा प्रसार रोखण्यासाठी 16 जानेवारीपासून मुंबईत लसीकरण सुरू झाले. सुमारे अडीच महिन्यांहून अधिक काळ लसीकरण सुरू आहे. सुरुवातीला लसीकरणाला थंड प्रतिसाद मिळत होता. नंतर लसीकरणाला मोठ्या प्रमाणात प्रतिसाद मिळू लागला. यामुळे पालिकेला मिळालेला लसीचा साठा संपण्याच्या मार्गावर आहे. मुंबईत महापालिकेच्या 33, राज्य आणि केंद्र सरकारच्या 16 तर खासगी 71 लसीकरण केंद्रांवर लसीकरण केले जात आहे. त्यापैकी खासगी रुग्णालयातील 25 लसीकरण तर महापालिकेच्या रुग्णालयातील 5 अशा एकूण 30 केंद्रांवर काल गुरुवारी लसीकरण बंद झाले आहे. गुरुवारी पालिकेच्या 8 केंद्रांवर 1 दिवस, 10 केंद्रांवर 2 दिवस, 2 केंद्रांवर 3 दिवस, 4 केंद्रांवर 4 दिवस पुरेल इतका, एका केंद्रावर 5 दिवस तर एका केंद्रावर 7 दिवस पुरेल इतका लसीचा साठा आहे. यामुळे आज शुक्रवारी बहुसंख्य केंद्र लसीअभावी बंद पडणार आहेत.

पालिकेच्या रुग्णालयात किती लसीचा साठा
व्ही एन देसाई, बिकेसी जंबो, बांद्रा भाभा, सेव्हन हिल्स, कांदिवली आंबेडकर हॉस्पिटल, सवित्रीबाई फुले, दहिसर जंबो सेंटर, ठाकरे मॅटर्निटी होम या 8 ठिकाणी एकच दिवस पुरेल इतकाच साठा आहे. हा साठा कधीही संपणार असल्याने लसीकरण बंद पडणार आहे. नायर, केईएम, शिरोडकर मॅटर्निटी होम, कूपर, गोकुलधाम मॅटर्निटी होम, एस. के. पाटील, एम डब्लू देसाई, कुर्ला भाभा, मुलुंड जंबो कोविड सेंटर, मिठागर म्युनिसिपल शाळा या 10 ठिकाणी 2 दिवस पुरेल इतकाच लसीचा साठा आहे. अर्बन हेल्थ सेंटर धारावी, गणेश नगर लसीकरण केंद्र घाटकोपर या 2 ठिकाणी 3 दिवस पुरेल इतका लसीचा साठा आहे. बाळासाहेब ठाकरे ट्रॉमा सेंटर, सेंटनरी गोवंडी, शिवाजी नगर सीसीसी, सावरकर हॉस्पिटल मुलुंड या 4 ठिकाणी 4 दिवस पुरेल इतकाच साठा आहे. मा हॉस्पिटल चेंबूर येथे 5 दिवस पुरेल इतका साठा आहे तर एलबीएस मॅटरनिटी भांडुप येथे 7 दिवसांच्या लसीचा साठा आहे.

कोव्हॅक्सीनचा वापर केवळ दुसऱ्या डोससाठी
कोरोनाच्या पार्श्वभूमीवर, भारत बायोटेकच्या कोव्हॅक्सिन लसीचा वापर राज्य सरकारच्या काही रुग्णालयांत आणि नंतर पालिकेच्या पाच रुग्णालयांत करायला सुरुवात झाली. मात्र, मुंबईत कोव्हॅक्सीन घेणाऱ्यांची संख्या खूप कमी असली तरी या लसीच्या तुटवड्यामुळे आता नव्याने लसीकरणासाठी येणाऱ्या व्यक्तीला ही लस न देता कोव्हिशील्ड दिली जात आहे तर कोव्हॅक्सीन लसीचा साठा केवळ दुसरा डोस घेणाऱ्या व्यक्तीला देण्यासाठी ठेवण्यात आला आहे. तसे निर्देश सगळ्याच लसीकरण केंद्रांना पालिकेने दिले आहेत, अशी माहिती नेस्को जम्बाे सेंटरच्या अधिष्ठाता डॉ. नीलम अंद्राडे यांनी दिली.

लसीसाठी पाठपुरावा सुरूच
मुंबईत कोरोना रुग्णांची संख्या वाढत आहे. त्यामुळे कोरोना रोखण्यासाठी पालिकेने लसीकरणावर भर दिला आहे. पालिकेने लसीची मागणी राज्य सरकारकडे केली आहे. राज्याने केंद्र सरकारकडे लसीचा पुरवठा करण्यासाठी पत्र दिले आहे. लसीचा साठा मिळावा, यासाठी आम्ही सतत पाठपुरावा करत आहोत, अशी माहिती पालिकेचे अतिरिक्त आयुक्त सुरेश काकाणी यांनी दिली.

लसीकरण थांबण्याला केंद्र सरकार जबाबदार - महापौर
मुंबईला लसीचा साठा कमी मिळाला असल्यामुळे आज दिवसभरात लसीकरण सुरू राहील. मात्र, उद्यापासून त्याचा फटका अनेक लसीकरण केंद्रांना बसणार असून त्यामुळे लसीकरण केंद्रे बंद करावी लागणार आहेत. केंद्र सरकार जगाला लस वाटत सुटले आहे. अगदी पाकिस्तानलाही केंद्र सरकारने लस पाठवली आहे. मग महाराष्ट्राला पुरेसा साठा का पाठवला नाही. त्यामुळे लसीकरण थांबले तर त्याला सर्वस्वी केंद्र सरकारच जबाबदार असेल, अशी माहिती महापौर किशोरी पेडणेकर यांनी दिली.

पालिकेचा नियोजन शून्य कारभार

पालिकेला लसीचा साठा उपलब्ध झाला आहे. सुरुवातीला लसीकरण क्षमतेने झाले नाही. त्यामुळे साठा पडून होता. आपल्याला लस किती येते त्यावरून लसीकरण केंद्र सुरू करायला हवी होती. ज्या वेगाने आणि ज्या क्षमतेने लसीकरण व्हायला हवे ते होत नाही. हा नियोजन शून्य कारभार आहे अशी टीका भाजपाचे गटनेते प्रभाकर शिंदे यांनी केली आहे. केंद्राकडे मागणी होईल तशी लस उपलब्ध होईल. केंद्रावर आरोप करणे योग्य नाही. आपण आपली क्षमता तपासावी. गुजरात मध्ये लसीकरणाचा वेग जास्त तर महाराष्ट्रात हा वेग कमी आहे. हा नियोजन शून्य कारभार दुर्लक्षित करता येणार नाही. उत्तर प्रदेश हे सर्वात मोठे राज्य आहे. या राज्यापेक्षा महाराष्ट्राला लस देण्यात आल्या आहेत. केंद्राकडे लसीची मागणी केली तर केंद्र तो साठा पाठवल्याशिवाय राहणार नाही. राजकारण न करता नियोजनशून्य काम थांबवावे. लसीची मागणी करावी ती मिळाल्याशिवाय राहणार नाही असे शिंदे म्हणाले.

लसीचा साठा आणि लसीकरण

१) लसीकरणासाठी महानगरपालिका आणि राज्य सरकारतर्फे ४९ लसीकरण केंद्रे तसेच ७१ खासगी रुग्णालयात केंद्रे कार्यान्वित करण्यात आली आहेत.२) सर्व केंद्रांवर मिळून दरदिवशी सरासरी ४० ते ५० हजार जणांचे लसीकरण करण्यात येते.३) मुंबईत ७ एप्रिलपर्यंत एकूण १७ लाख ९ हजार ५५० इतक्या लसी उपलब्ध झाल्या. त्यापैकी १५ लाख ६१ हजार ४२० जणांना लस देण्यात आल्या आणि १ लाख ४८ हजार १३० इतका लससाठा ७ एप्रिलपर्यंत शिल्लक होता. ४) शिल्लक साठ्यातील ४४ हजार ८१० इतक्या लस दुसऱ्या डोससाठी राज्य सरकारच्या निर्देशानुसार राखीव आहे. म्हणजेच एकूण १ लाख ३ हजार ३२० इतक्या लसी सकाळपर्यंत उपलब्ध होत्या. ८ एप्रिलला सुमारे ४० ते ५० हजार लसीकरण पूर्ण झाल्यानंतर शुक्रवार ९ एप्रिलपर्यंत पुरेल इतका लससाठा उपलब्ध असेल.

15 लाख 80 हजार लसीकरण

8 एप्रिलपर्यंत एकूण 15 लाख 80 हजार 727 लाभार्थ्यांना लस देण्यात आली. त्यात 14 लाख 02 हजार 783 लाभार्थ्यांना पहिला तर 1 लाख 77 हजार 944 लाभार्थ्यांना दुसरा डोस देण्यात आला. आतापर्यंत एकूण 2 लाख 56 हजार 336 आरोग्य कर्मचारी, 2 लाख 73 हजार 576 फ्रंटलाईन वर्कर, 6 लाख 47 हजार 420 जेष्ठ नागरिक तर 45 ते 59 वर्षामधील गंभीर आजार असलेल्या 4 लाख 3 हजार 395 लाभार्थ्यांना लस देण्यात आली.

ही लसीकरण केंद्रे बंद

खासगी रुग्णालय१) एचसीजी आयसीएस खुबचंदानी कॅन्सर २) हबीब हॉस्पिटल३) ब्रिच कॅन्डी४) भाटीया रुग्णालय (ताडदेव) ५) बी डी पेटीट पारसी हॉस्पिटल६) सेंट एलिझाबेथ रुग्णालय७) लायन ताराचंद बाप्पा रुग्णालय८) सूर्या रुग्णालय९) क्रिटीकेअर रुग्णालय१०) लायन कर्तारसिंह रुग्णालय११) आरोग्यनिधी रुग्णालय१२) लाईफलाईन मेडिकेअर रुग्णालय१३) श्री बाबाजी सुपर स्पेशालिटी रुग्णालय१४) रिद्धी विनायक क्रिटीकलर केअर१५) संजीवनी रुग्णालय१६) थुंगा रुग्णालय१७) लाईफलाईन मल्टीस्पेशालिटी१८) ऑस्कर रुग्णालय१९) कांदिवली हितवर्धक मंडळ२०) कोहिनूर रुग्णालय२१) सर्वोदय रुग्णालय२२) गोदरेज मेमोरिअल रुग्णालय२३) डॉ. मिनाज मल्टीस्पेशालिटी २४) डॉ. भाटीया रुग्णालय (भांडुप) २५) फोर्टीज रुग्णालय

मुंबई महापालिका रुग्णालय

१) सायन रुग्णालय२) राजावाडी रुग्णालय ३) शताब्दी रुग्णालय, कांदिवली४) माहीम मॅटरनिटी होम५) कस्तुरबा हॉस्पिटल

हेही वाचा - वाझे प्रकरणात आपला काडीचा संबंध नाही : उपमुख्यमंत्री अजित पवार