मुंबई - छत्रपती शिवाजी महाराज टर्मिनसला जोडणारा पादचारी पूल कोसळून झालेल्या दुर्घटनेत ६ पादचाऱ्यांना हकनाक जीव गमवावा लागला. या घटनेचे तीव्र राजकीय पडसाद उमटत असून राष्ट्रवादीचे अध्यक्ष शरद पवार यांनी चिंता व्यक्त केली आहे. बुलेट ट्रेनची गरज काय ? आधी रेल्वेच्या पायाभूत सुविधा उभारा, असा सल्ला त्यांनी राज्यकर्त्यांना दिल्या. विरोधीपक्ष नेते धनंजय मुंडे यांच्या निवासस्थानी आयोजित पत्रकार परिषदेत ते बोलत होते .
पूल दुर्घटनेविषयी बोलताना पवार यांनी सांगितले, मुंबईमध्ये विरार ते चर्चगेट आणि कर्जत ते सीएसएमटी या मार्गावर १ कोटी लोक प्रवास करतात यात वेगवेगळे अपघात होतात, त्या अपघातात रोज १५ ते २० अपघात होतात आणि वर्षाला २५०० ते ३००० लोकांचा मृत्यू होतो, तर महिन्याला १ ते २ हजार जखमी होतात. ही अतिशय चिंतेची बाब आहे. रेल्वे प्रशासन , राज्य सरकार आणि रेल्वे मंत्रालयाने याची गंभीर दखल घेतली पाहिजे.
