मुसळधार पावसाचा मंत्रालयाला फटका; तळ मजल्यावर सिलिंगचा भाग कोसळला

मंत्रालयाच्या तळमजल्यावरच पोलीस नियंत्रण कक्ष आहे. या ठिकाणी सामान्य नागरिकांसह पोलिसांचा कायम राबता असतो. याच तळमजल्यावर अचानक हा भाग कोसळल्याने पोलिसांची धावाधाव झाली.

मुंबई - एकीकडे मुसळधार पावसाने मुंबईचे जनजीवन विस्कळीत झाले असतानाच या पावसाचा मंत्रालयाला फटका बसला आहे. मंत्रालयातही सिलिंगवर पाणी झिरपल्याने सोमवारी दुपारी तीनच्या दरम्यान सिलिंगचा काही भाग कोसळला. या दुर्घटनेत कुणीही जखमी झाले नाही.

मंत्रालयाच्या तळमजल्यावरच पोलीस नियंत्रण कक्ष आहे. या ठिकाणी सामान्य नागरिकांसह पोलिसांचा कायम राबता असतो. याच तळमजल्यावर अचानक हा भाग कोसळल्याने पोलिसांची धावाधाव झाली. सार्वजनिक बांधकाम विभागाच्या अधिकाऱ्यांनीही घटनास्थळाची पाहणी करून ताबडतोब कोसळलेल्या भागाचा ढीग रिकामा केला. या घटनेबाबत मात्र सार्वजनिक बांधकाम विभागाच्या अधिकाऱ्यांनीही काहीही बोलण्यास नकार दिला.

गेल्या वर्षीच्या पहिल्याच पावसात सातव्या मजल्यावरील पशु संवर्धन मंत्री महादेव जानकर यांच्या दालनाबाहेर ही गळती लागली होती. मंत्रालयाला लागलेल्या आगीनंतर २०११ साली मंत्रालयाच्या मुख्य इमारतीचे नूतनीकरण करण्यात आले. इमारतीच्या आतल्या बाजूला कॉरपोरेट कार्यालयाचा चेहरा देण्यात आला आहे. मात्र, या नूतनीकरणात अनेक त्रुटी असल्याचे समोर येत आहे.