मुंबई : माजी गृहमंत्री अनिल देशमुख यांनी दाखल केलेल्या जामीन अर्जामध्ये निलंबित पोलीस अधिकारी सचिन वाझे ( Suspended police officer Sachin Waze ) आणि माजी पोलीस आयुक्त परमवीर सिंग ( Former Police Commissioner Paramveer Singh ) यांनी सीबीआय आणि निवृत्त न्यायमूर्ती चांदीवाल आयोग यांच्यासमोर दिलेल्या वेगवेगळ्या जबाबाचा आधार घेत असे म्हटले आहे की, दोन्हीही व्यक्तींनी स्वतःला वाचवण्यासाठी माजी गृहमंत्री अनिल देशमुख ( Former Home Minister Anil Deshmukh ) यांना फसवण्याचा प्रयत्न केला आहे. या अर्जावर 14 सप्टेंबर रोजी उत्तर सादर करण्याचे निर्देश विशेष सीबीआय कोर्टाने सीबीआयला दिले आहे. ( Central Investigation Department )
विधानांमध्ये विरोधाभास असल्याचे जामीन अर्जामध्ये म्हटले : देशमुख यांनी सिंग आणि वाझे यांनी सीबीआयला दिलेल्या जबाबात आणि माजी मंत्र्यावरील आरोपांची चौकशी करण्यासाठी स्थापन करण्यात आलेल्या निवृत्त न्यायमूर्ती के यू चांदीवाल आयोगासमोर नोंदवलेल्या विधानांमध्ये विरोधाभास असल्याचे जामीन अर्जामध्ये म्हटले आहे.
ओळखपत्रांवर प्रश्नचिन्ह उपस्थित : केंद्रीय अन्वेषण विभागाने दाखल केलेल्या भ्रष्टाचाराच्या गुन्ह्यात जामीन मागताना माजी गृहमंत्री अनिल देशमुख यांनी मुंबईचे माजी पोलीस आयुक्त परमवीर सिंग आणि निलंबित पोलीस अधिकारी सचिन वाझे यांच्या ओळखपत्रांवर प्रश्नचिन्ह उपस्थित केले आहे. विशेष न्यायालयाने केंद्रीय एजन्सीला 14 ऑक्टोबरपर्यंत याचिकेवर उत्तर दाखल करण्यास सांगितले आहे.
न्यायालयाला दिलेल्या अर्जात देशमुख यांनी दावा केला की : गुरुवारी विशेष सीबीआय न्यायालयाला दिलेल्या अर्जात देशमुख यांनी दावा केला की, त्यांच्यावर लावलेले सर्व आरोप हे केवळ तपास यंत्रणांच्या लहरीपणा आणि कल्पनांवर आधारित आहेत. यामुळे ज्या विधानांवर सीबीआयने हे संपूर्ण प्रकरण घडवले त्यावरही आता प्रश्नचिन्ह होत आहे.
मनी लाँड्रिंग प्रकरणात जामीन मंजूर : देशमुख यांना नोव्हेंबर 2021 मध्ये अंमलबजावणी संचालनालयाने मनी लॉन्ड्रिंगच्या चौकशीचा एक भाग म्हणून अटक केली होती. ते सध्या आर्थर रोड कारागृहात आहे. मुंबई उच्च न्यायालयाने मंगळवारी त्यांना ईडीने नोंदवलेल्या मनी लाँड्रिंग प्रकरणात जामीन मंजूर केला आहे. परंतु 13 ऑक्टोबरपर्यंत स्थगिती आदेशही जारी केला. ज्यामुळे एजन्सी या निकालाविरुद्ध अपील करू शकत नाही. दुसरीकडे सीबीआय देशमुख यांच्याविरुद्धच्या भ्रष्टाचाराच्या प्रकरणाचाही तपास करत आहे.
भ्रष्टाचार प्रकरणी विशेष सीबीआय न्यायालयात जामिनासाठी अर्ज : देशमुख यांनी त्यांचे वकील अनिकेत निकम आणि इंद्रपाल सिंग यांच्यामार्फत भ्रष्टाचार प्रकरणी विशेष सीबीआय न्यायालयात न्यायाधीश एस. एच. ग्वालानी यांच्यासमोर जामिनासाठी अर्ज केला आहे. अर्जात देशमुख यांनी दावा केला की त्यांच्याविरुद्ध दाखल करण्यात आलेला गुन्हा तपास यंत्रणेच्या लहरीपणा आणि कल्पनांवर आधारित आहे. तसेच सीबीआयचे संपूर्ण प्रकरण ज्या विधानावर आधारित आहे ते विधान पूर्णपणे संशयास्पद असून विधान करणाऱ्यांच्या विश्वासार्हतेवर गंभीर प्रश्न उपस्थित करत असल्याचही अर्जात म्हटलं आहे.
जबरदस्तीने कागदपत्रांवर सह्या : आयोगासमोर वाझेच्या साक्षीचा संदर्भ देत याचिकेत म्हटले आहे की, जेव्हा एनआयए कोठडीत होते तेव्हा त्यांच्यावर दबाव होता. तो त्याच्या आयुष्यातील सर्वात क्लेशकारक काळ होता. एजन्सीद्वारे त्याचा छळ आणि अपमान करण्यात आला. देशमुख यांच्यावरील आरोपांना पुष्टी देणारा कोणताही पुरावा त्यांच्याकडे नव्हता. त्याला जबरदस्तीने कागदपत्रांवर सह्या करण्यास भाग पाडले होते असे म्हटले आहे.
