मुंबई - कोरोनाचा प्रादुर्भाव शहरांमध्ये वाढत असताना अनेक नागरिकांनी गावाकडे धाव घेतली आहे. मात्र महाराष्ट्राच्या ग्रामीण भागात अनेक गावकऱ्यांनी शहरातील लोकांना प्रवेशबंदी केली आहे. यामुळे नागरिकांवर वेगळेच संकट ओढवल्याचे दिसते. या पार्श्वभूमीवर गावकऱ्यांनी कायदा हातात घेऊ नका, असे आवाहन राज्याचे महसूल मंत्री बाळासाहेब थोरात यांनी केले आहे. पोलिसांना त्यांचे काम करू द्या, असा इशारा गावकऱ्यांना दिला आहे.
''शहरातील काही नागरिक गावाकडे निघालेत. ही धावपळ, पळापळ कशासाठी? तुम्ही जेथे आहात तिथेच सुरक्षित राहा. तुम्हाला जीवनावश्यक सुविधा पुरवायला शासन कटिबद्ध आहे. यातून नवे वाद होतील, प्रशासनावर ताण निर्माण होईल. माझी विनंती आहे आपण धावपळ करून गावाकडे जाण्याचा प्रयत्न टाळावा. शहरातील नागरिक गावाकडे आल्याने काही ठिकाणी वादाची परिस्थिती निर्माण होतेय. गावकरी बांधवांना माझी विनंती आहे. आपण काळजी घ्या, मात्र कायदा हातात घेऊ नका, पोलिसांचे काम पोलिसांना करू द्या,'' असं महसूलमंत्री बाळासाहेब थोरात म्हणाले.
