मुंबई - कोरोनाची दुसरी लाट ओसरत असताना महाराष्ट्र सरकारने महत्त्वाचा निर्णय घेतला आहे. १ डिसेंबरपासून राज्यातील प्राथमिक शाळा सुरू ( Primary schools to start in Maharashtra ) होणार आहेत. हा निर्णय राज्य मंत्रिमंडळाच्या ( Maharashtra cabinet decision ) बैठकीत घेण्यात आल्याची माहिती शालेय शिक्षण मंत्री वर्षा गायकवाड यांनी पत्रकार परिषदेत दिली.
शालेय शिक्षण मंत्री वर्षा गायकवाड म्हणाल्या, की राज्यात आता पहिली ते बारावीपर्यंत आता सर्व शाळा सुरू होणार आहे. ग्रामीण भागात पाचवी ते बारावी आणि शहरी भागात आठवी ते बारावी शाळा सुरू झाल्या आहेत. मागील काळात आम्ही मोठी खबरदारी घेतली होती. ही सर्व मुले छोटी आहेत. पण, तरीही या मुलांना शाळेत आणणे महत्त्वाचे आहे. टास्क फोर्सशीदेखील आम्ही चर्चा करणार आहोत
परिस्थिती पाहून शाळा सुरू करण्याचा निर्णय-
शिक्षकांनी काय गोष्टी केल्या पाहिजेत, यावर आम्ही अभ्यास केला आहे. आम्ही आठ दिवस पालकांशी व अधिकाऱ्यांशी चर्चा करणार आहोत. सुरक्षित वातावरण कसे देता येईल यावर भर देणार आहोत. निवासी शाळाबाबत आम्ही लवकर निर्णय घेऊ. दिवाळीनंतर काय परिस्थिती आहे, हे पाहून आम्ही प्राथमिक शाळा सुरू करण्याचा निर्णय घेतला आहे. विद्यार्थी पूर्ववत जीवनात यायला हवेत. त्यासाठी आम्ही आज शाळा सुरू करण्याचा निर्णय घेतला आहे. आरोग्य विभागाचा निर्णय आल्यानंतर आम्ही या शाळा सुरू करत आहोत. तिसऱ्या लाटेवर आमची नजर होती. मात्र, परिस्थिती बघून आम्ही निर्णय घेतला आहे.
मुख्यमंत्र्यांना तब्येतीसाठी शुभेच्छा
मुख्यमंत्री व्हीसीद्वारे कॅबिनेटमध्ये आले होते. त्यांची तब्येत लवकर सुधारावी अशा माझ्या शुभेच्छा आहेत. लवकरच मुख्यमंत्री आपल्या सर्वांना भेटतील, असेही शालेय शिक्षण मंत्र्यांनी सांगितले.
हेही वाचा-SSC-HSC EXAM : दहावी-बारावीच्या परीक्षा यावर्षी ऑफलाईनच?, शिक्षण विभागाच्या बैठकीत एकमत
गेल्या दीड वर्षांपासून शाळा बंद आहेत. सरसकट शाळा सुरू व्हाव्यात याकरिता पालकांकडून दबाव वाढू लागला आहे. शालेय शिक्षण मंत्री वर्षा गायकवाड आणि आरोग्य मंत्री राजेश टोपे यांची टास्क फोर्स समितीसोबत नुकतीच बैठक झाली.
हेही वाचा-School reopening : पहिली ते चौथीपर्यंतच्या शाळांचा आज फैसला ?
टास्क फोर्सने काय म्हटले ?
कोरोनाची साथ आटोक्यात आली आहे. हळूहळू निर्बंध शिथिल करण्यात येत आहेत. चित्रपटगृह, नाट्यगृह सुरू केले आहेत. उपहारगृह, दुकानांच्या वेळा वाढवून दिल्या आहेत. महाविद्यालये, अभियांत्रिकी महाविद्यालय, विद्यापीठ, कृषी विद्यापीठ सुरू केली आहेत. पाचवी ते दहावी पर्यंतचे वर्गही सुरू करण्यात आले आहेत. १२ वर्षे वयोगटावरील मुलांचे लसीकरण केले जाणार आहे. सध्या इयत्ता पहिली ते चौथी पर्यंतचे वर्ग अद्याप सुरू केलेले नाहीत. मुलांच्या लसीकरणाशिवाय शाळा सुरू करू नयेत, असे टास्क फोर्स समितीचे म्हणणे होते. आता समितीच्या नव्या शिफारशीनुसार काही अटी शर्ती घातल्या आहेत. कठोर अंमलबजावणीच्या सूचना देताना, लहान मुलांना कोरोनाचा संसर्ग होण्याचा धोका नगण्य असून पालकांनी चिंता करण्याचे कारण नसल्याचे टास्क फोर्सचे म्हणणे आहे.
हेही वाचा-...त्यानंतरच शाळा सुरू करण्याबाबत निर्णय होणार - शिक्षणमंत्री वर्षा गायकवाड
