मुंबई - काँग्रेस प्रदेशाध्यक्ष नाना पटोले ( Nana Patole statement about PM Modi ) यांनी पंतप्रधान नरेंद्र मोदी यांच्याविषयी केलेल्या एका वक्तव्यामुळे राज्यातील राजकारण आता पुन्हा एकदा तापण्याची शक्यता निर्माण झाली आहे. पटोले यांनी ‘मी मोदींना मारू शकतो आणि शिव्या देऊ शकतो’, असे वक्तव्य केले आहे. त्याबाबतचा एक व्हिडिओ सध्या सोशल मीडियावर चांगलाच व्हायरल होतो आहे. दरम्यान, हा व्हिडिओ व्हायरल झाल्यानंतर पोटोले यांनी याबाबत सारवासारव करण्याचा प्रयत्न केला. मात्र, विधानसभेतील विरोधी पक्षनेते देवेंद्र फडणवीस, भाजप प्रदेशाध्यक्ष चंद्रकांत पाटील, विधान परिषदेतील विरोधी पक्षनेते प्रवीण दरेकर यांच्यासह अनेक भाजप नेते आक्रमक झाले आहेत. त्यांनी पटोले यांच्यावर जोरदार हल्ला चढवला आहे.
काँग्रेस पक्षाचे चालले तरी काय? देवेंद्र फडणवीस
पाकिस्तानच्या सीमेनजिक पंजाबमध्ये पंतप्रधान नरेंद्र मोदी यांचा ताफा 20 मिनिटे खोळंबून राहतो. तेथील काँग्रेसचे मुख्यमंत्री त्याची साधी दखल सुद्धा घेत नाहीत. आता महाराष्ट्राचे काँग्रेस अध्यक्ष म्हणतात, मी मोदींना मारू शकतो, शिव्या देऊ शकतो. काँग्रेस पक्षाचे चालले तरी काय? कधीकाळी स्वातंत्र्याच्या आंदोलनात असणारा हा पक्ष इतक्या रसातळाला? सत्तेसाठी काहीही? काँग्रेसला आता लोकशाहीतील राजकीय पक्ष म्हणायचे, की दहशत पसरविणारे संघटन? नानाभाऊ केवळ शारीरिक उंची असून चालत नाही. वैचारिक - बौद्धिक उंची पण असावी लागते!’ असे ट्वीट करत फडणवीस ( Devendra Fadnavis react on nana patole statement ) यांनी पटोलेंवर जोरदार निशाणा साधला आहे.
भ्रमिष्टासारखे नानांचे वर्तन!
या बाबत बोलताना भाजप प्रदेशाध्यक्ष चंद्रकांत पाटील म्हणाले की, ‘नेता तैसा कार्यकर्ता, त्यांचे राष्ट्रीय नेते मध्येच गायब होतात, काहीही बोलतात, परिणाम काय होईल, परंपरा काय त्या मोडल्या जातील याची काळजी करत नाहीत. त्यात त्यांचे अध्यक्ष नाना पटोले वेगळे काय करणार? मी त्यांना भ्रमिष्ट म्हणत नाही, पण भ्रमिष्टासारखे त्यांचे वर्तन सुरू आहे. पंजाबमधील घटनेला ते नौटंकी काय म्हणाले, अमित शहांवर त्यांनी आरोप केला की त्यांचाच हा कट आहे. काय बोलतो, काय अर्थ होतो, याचा काही त्यांना पत्ता नाही. भारतीय जनता पार्टी हे सहन करणार नाही. आम्ही सगळ्या जिल्हाध्यक्षांना सांगणार आहोत की, आपल्या जिल्ह्यात या विषयावर आक्रमक व्हा’, असा आदेश चंद्रकांत पाटील यांनी भाजप कार्यकर्त्यांना दिला आहे.
याची किंमत नानांना चुकवावी लागेल!
नाना पटोले यांनी केलेले वक्तव्य अतिशय दुर्दैवी आहे. याचा आम्ही धिक्कार करतो, निषेध करतो, असे विधान परिषदेचे विरोधी पक्षनेते प्रवीण दरेकर यांनी म्हटले आहे. पंतप्रधान हे कुठल्या पक्षाचे नसतात तर, ते देशाचे असतात, त्याचा विसर नाना पटोले यांना पडलेला आहे. नाना पटोले यांनी काँग्रेसची रया घालवली असून त्यांना निवडणुकीत यश भेटत नाही म्हणून हे सर्व सुरू आहे. काँग्रेस पक्ष हा एक वैभवशाली परंपरा असलेला पक्ष आहे. असे असताना जर नाना पटोले असे वक्तव्य करत असतील तर, ते फार दुर्दैवी आहे. याने सातत्याने त्यांचा बालिशपणा उघड होत आहे. याची किंमत नाना पटोले यांना चुकवावी लागेल, असेही दरेकर ( Praveen Darekar react on nana patole statement ) यांनी सांगितले.
नाना पटोले यांचे स्पष्टीकरण
जे काही वक्तव्य मी मोदी यांच्याविषयी बोललो तो मोदी म्हणजे पंतप्रधान मोदी नाही, तर तो एक गाव गुंड आहे. मोदी नावाच्या गावगुंडाबद्दल मी असे सांगितले. निवडणुकी प्रचारादरम्यान असे मी वक्तव्य केलेल आहे. पंतप्रधान मोदींविषयी असे वक्तव्य केलेले नाही, अशी सारवासारव काँग्रेस प्रदेशाध्यक्ष नाना पटोले यांनी केली.
देशाचे पंतप्रधान नरेंद्र मोदी यांद्याबद्दल मी अपशब्द वापरल्याचा एक व्हिडिओ सोशल मीडियावर व्हायरल केला आहे. या व्हिडिओतील मोदी नावाचा पंतप्रधान नरेंद्र मोदी यांच्याशी संबंध नसून माझ्या मतदार संघातील मोदी नावाच्या स्थानिक गुंडाबाबत मी बोलत होतो, असे महाराष्ट्र प्रदेश काँग्रेस कमिटीचे अध्यक्ष नाना पटोले यांनी स्पष्ट केले.
व्हिडिओ खोडसाळपणे सोशल मीडियावर व्हायरल
सोशल मीडियावर व्हायरल झालेल्या व्हिडिओबद्दल बोलताना नाना पटोले पुढे म्हणाले की, माझ्या मतदारसंघातील स्थानिक गुंड मोदीबद्दल नागरिकांनी माझ्याकडे तक्रारी केल्या असता मी त्यांच्याशी बोलतानाचा तो व्हिडिओ असून खोडसाळपणे सोशल मीडियावर तो व्हायरल केला जात आहे. मी पुन्हा स्पष्ट करतो की, मी तिथे पंतप्रधान मोदींबद्दल नाही तर, मोदी नावाच्या स्थानिक गुंडाबाबत बोलत होतो. पण भारतीय जनता पक्षाचे नेते देवेंद्र फडणवीस, चंद्रकांत पाटील यांच्यासह इतर काही उतावीळ भाजप नेते त्या वक्तव्याचा संबंध खोडसाळपणे व जाणीवपूर्वक पंतप्रधान मोदी यांच्याशी जोडून पंतप्रधान मोदी यांचा तेच अवमान करत आहेत हे दुर्दैवी आहे.
आमची ती संस्कृतीही नाही
भाजपच्या नेत्यांनीच माजी पंतप्रधान डॉ. मनमोहन सिंह, काँग्रेसच्या अध्यक्षा सोनिया गांधी, राहुल गांधी, प्रियांका गांधी यांच्याबद्दल सातत्याने अपशब्द वापरले, त्यांच्या बदनामीची मोहीमही राबवली. पण, काँग्रेसने नेहमीच संविधानिक पदावरील व्यक्तींचा आदर केलेला आहे. पंतप्रधान हे देशाचे सर्वोच्च नेते असतात, त्यांच्या पक्षाबद्दल वैचारिक मतभेद असू शकतात, त्यांच्या धोरणांवर, कामाच्या पद्धतीवर टीका केली जाऊ शकते, परंतु त्यांच्याबद्दल व्यक्तीगत पातळीवर आम्ही कधीही अपशब्द वापरलेला नाही, आमची ती संस्कृतीही नाही. मी जे बोललो त्याचा पंतप्रधानांशी संबंध दाखवून नाहक बदनामी करण्याचा हा प्रकार आहे, असेही नाना पटोले म्हणाले.
हेही वाचा - Mumbai Municipal Corporation : मुंबईतील मैदाने, उद्यानांना थीम पार्कचा लूक; पालिका करणार २५ कोटीचा खर्च
