मुंबई - मनसे अध्यक्ष राज ठाकरेंनी गुढीपाडव्याला मशिदीवरील भोंग्याविषयी भाष्य केले होते. अनधिकृत भोंगे हटवले नाहीत, तर हनुमान चालीसा लावू, असा इशारा ठाकरेंनी दिला ( Raj Thackeray Loudspeaker Controversy ) होता. त्यानंतर राज्यातील राजकीय आणि धार्मिक वातावरण ढवळून निघाले होते. त्यातच आता मनसेच्या चित्रपट सेनेककडून 'भोंगा अजान' नावाचा चित्रपटच प्रदर्शित केला जाणार ( MNS Release Bhonga Movie ) आहे.
'भोंगा अजान' 3 तारखेला होणार प्रदर्शित - मनसेचे सरचिटणीस संदीप देशपांडे ( Sandeep Deshpande ) व चित्रपट सेनेचे अध्यक्ष अमेय खोपकर ( Amey Khopkar ) यांची निर्मिती असलेला हा चित्रपट 3 मे ला अक्षय तृतीयेच्या मुहूर्तावर प्रदर्शित केला जाणार आहे. यासंदर्भात माहिती देताना देशपांडे म्हणाले की, "भोंगा या विषयावर राज ठाकरे सातत्याने आपली भूमिका मांडत आले आहेत. हा कोणताही धार्मिक मुद्दा नसून, सामाजिक मुद्दा आहे. हे पटवून देण्यासाठी चित्रपटा सारखे दुसरे प्रभावी माध्यम नाही. याच विषयावर भाष्य करणारा हा चित्रपट आहे."
2018 लाच चित्रपट पूर्ण - अमेय खोपकर यांनी सांगितले की, "हा चित्रपट 2018 सालीच बनवून पूर्ण झाला होता. 2019 ला या चित्रपटाला अनेक नामांकित राष्ट्रीय पुरस्कार मिळाले आहेत. इतकेच नाही तर राज्य सरकारने देखील या चित्रपटाचा गौरव केला आहे. या चित्रपटाच्या निमित्ताने पक्षाची नेमकी भूमिका लोकांना समजण्यास नक्कीच मदत होईल."
राज ठाकरेंच्या परवानगीनेच तारीख निश्चित - "पक्षाकडून तीन तारखेला संपूर्ण राज्यभर अक्षय तृतीयेच्या निमित्ताने सामूहिक महाआरतीचे आयोजन करण्यात आले आहे. त्यामुळे राज ठाकरेंच्या परवानगीने आम्ही ही तारीख निवडली आहे. तसेही, अक्षय तृतीयेच्या निमित्ताने आपल्या हिंदू धर्मात अनेक शुभ कामाची सुरुवात केली जाते. त्यामुळे या उपक्रमाची सुरुवात सुद्धा तीन तारखेलाच होईल," असेही खोपकर यांनी म्हटलं आहे.
