मुंबई - भोंग्यावरून राज ठाकरे यांनी दिलेले अल्टिमेटम आज ४ मे रोजी संपत असल्याने, मुंबईसह महाराष्ट्रभर बऱ्याच ठिकाणी मनसेतर्फे हनुमान चालीसा पठण मशिदीसमोर करण्यात आले. तर बऱ्याच ठिकाणी मशिदीवर वीणा भोंग्याचे अजान पठण करण्यात आले. पाहूया सकाळी महत्वाच्या काही ठिकाणी काय काय झाले.
याठिकाणी रंगला अजान व हनुमान चालीसा पठणचा कार्यक्रम - महाराष्ट्र नवनिर्माण सेनेचे अध्यक्ष राज ठाकरे यांनी मशिदीवरील भोंगे उतरवण्याबाबत दिलेल अल्टीमेटम काळ संपल्यानंतर आज पहाटेपासून मनसैनिक याबाबत ज्या ठिकाणी भोंग्या वरून अजान पठण केले जाईल त्याला उत्तर देण्यासाठी त्याठिकाणी हनुमान चालीसा लावण्यासाठी तयारीत होते. राज्यभरातील मनसैनिक यासाठी आक्रमक झाले होते. मुंबईत सांगायच झाले तर कांदिवली चारकोप येथे सकाळी अजान दरम्यान मशिदीसमोर मनसैनिकांनी हनुमान चालीसा लावली. यादरम्यान हनुमान चालीसा पठण करण्यात आलं. चारकोप मधील व्हिडिओ सध्या मोठ्या प्रमाणामध्ये वायरल होताना दिसत आहे. तर दुसरीकडे मुंबईमध्ये मुंबादेवी येथे काल अक्षय तृतीया निमित्त हनुमान चालीसा पठण करण्यात असल्याने या दरम्यान बऱ्याच मनसैनिकांना पोलिसांनी ताब्यात घेतलं. तर दुसरीकडे वाशिममध्ये सुद्धा मशिदीसमोर हनुमान चालीसा पठण करण्यात आलं. इथेसुद्धा अजान चालू झाल्यानंतर हनुमान चालीसा लावण्यात आली. तर नाशिक मध्ये मारुती रोड हनुमान मंदिरामध्ये हनुमान चालीसा पठण करण्यात आली. या प्रसंगी पोलिसांनी मनसैनिकांची धरपकड करण्यात सुरुवात केली आहे. नाशिक मध्ये मनसेच्या ७ ते ८ महिला पदाधिकाऱ्यांसह १४ जणांना पोलिसांनी नोटीस दिली तर २९ जण ताब्यात घेतले आहेत. नवीमुंबई नेरूळ परिसरात अजान सुरू असताना सुद्धा हनुमान चालीसा पठण करण्यात आली.
या ठिकाणी भोंग्यावरून बांग देण्यात आली नाही - मुंबईतील प्रसिद्ध वांद्रा येथील जामा मशिदीत आज भोंग्यावरून अजान पठण करण्यात आली नाही. विशेष म्हणजे याठिकाणी पोलिसांचा मोठा बंदोबस्त तैनात करण्यात आला होता. त्याचबरोबर मनसैनिक सुद्धा तयारीत होते परंतु याठिकाणी विना भोंग्याची अजान पठण करण्यात आली. तर दुसरीकडे मुंबईत मुंब्रा परिसरातील दारूफाला या मशिदीत सुद्धा विना भोंग्याची अजान पठण करण्यात आली. त्याचबरोबर भिवंडी मध्ये सुद्धा पडघा मध्ये विना भोंग्याची अजान पठण करण्यात आलं. वास्तविक वांद्रे, मुंब्रा आणि भिवंडी हे परिसर मुस्लिम बहुल इलाके असल्याने या ठिकाणी पोलिसांचा मोठा बंदोबस्त तैनात करण्यात आला आहे. त्याचबरोबर पनवेल मध्ये सुद्धा मशिदीमध्ये विना भोंग्याची अजान पठण करण्यात आली. या सर्व ठिकाणी मुस्लीम बंधूंनी पोलिसांना त्याच बरोबर सामाजिक एकोपा जपत सहकार्य केलं आहे. तर औरंगाबाद मध्ये मनसेचे कार्यकर्ते भूमिगत झाले आहेत. पोलिसांनी मनसे कार्यकर्त्यांना घरी जाऊन त्यांच्या नोटिसा बजावल्या आहेत. त्याचबरोबर पालघरमध्ये सुद्धा पोलिसांचा मोठा बंदोबस्त मशिदी बाहेर तैनात करण्यात आला आहे.
मुंबई पोलीस आयुक्त संजय पांडे रस्त्यावर - संपूर्ण राज्यभर भोंगा व हनुमान चालीसा यावरून वाद चिघळला असताना, तसेच मनसे अध्यक्ष राज ठाकरे यांनी मशिदींवरील भोंग्यांना उतरवण्यासाठी दिलेलं अल्टिमेटम संपत असल्याने पोलिसांवरील ताण प्रचंड वाढला आहे. त्यातच हनुमान चालीसाचे पठण मनसैनिकांकडून मोठ्या प्रमाणात होणार असल्याने मुंबई पोलीस आयुक्त संजय पांडे सकाळपासूनच मुंबईतील विविध भागांचा आढावा घेताना दिसून आले. धारावी येथील पोलीस स्टेशन मध्ये सुद्धा त्यांनी भेट देऊन एकंदरीत परिस्थितीचा आढावा घेतला. त्याचबरोबर मुंबईतील इतर ठिकाणी ते सतत आढावा घेत असल्याचे चित्र दिसून आलं. मुंबईतील सर्व पोलीस वरिष्ठ अधिकारी, हवालदार यांच्या सुट्ट्या रद्द करण्यात आल्या आहेत.
संदीप देशपांडे यांनी मानले मुस्लिम बांधवांचे आभार - आज राज ठाकरे यांनी दिलेल्या अल्टिमेटम नंतर पहिलाच दिवस असल्याने बऱ्याच ठिकाणी बांग जी आहे ती भोग्या वरून न दिल्याने चित्र सुद्धा दिसून आलं. या बाबत बोलताना मनसे सरचिटणीस संदीप देशपांडे यांनी सांगितल आहे की आज सर्व मनसैनिक तयार होते. परंतु बऱ्याच ठिकाणी आज अजान ही भोंग्या वरून झाली नाही. काही ठिकाणी झाली त्या ठिकाणी मनसैनिकांनी हनुमान चालीसा लावून त्याला प्रतिउत्तर दिलेल आहे. परंतु ज्या पद्धतीने आज मुंबई मध्ये जामा मशिद असेल, माहीम असेल, मुंब्रा असेल, भिवंडी असेल या ठिकाणी विना भोंग्या वरूनच अजान पठण करण्यात आली. त्यामुळे त्यांनी मुस्लिम बांधवांचे आभार मानले आहेत. राज ठाकरे यांनी अगोदरच सांगितले आहे हा विषय धार्मिक नसून सामाजिक आहे. तो त्यांना पटत असल्याचे चित्र दिसून आल्याचे सुद्धा संदीप देशपांडे यांनी सांगितलं आहे. आमचा अजान ला विरोध नाही आहे, फक्त आमचा विरोध लाऊड स्पीकरला आहे असेही ते म्हणाले. आजच्या चित्रावरुन हे दिसतं की महाविकास आघाडीतील नेते खोटा प्रचार करत असल्याने आता ते उघडे पडले आहेत असेही संदीप देशपांडे म्हणाले.
हेही वाचा - Loudspeaker Row LIVE Updates : चारकोपमध्ये इमारतीच्या टेरेसवर चढून मनसेचा झेंडा फडकावत हनुमान चालीसा
