मुंबई - शाळांच्या वेळा, दिवाळी व उन्हाळी सुट्ट्या तसेच विद्यार्थ्यांच्या परीक्षांच्या तारखा जाहीर करण्याचे कोणतेही अधिकार नसतांना मंत्रालयातील अधिकारी सर्रास परिपत्रके काढतात. हे अधिकारी नियमबाह्य काम करीत असल्याचा आरोप भाजपा शिक्षण आघाडीने लावला ( Ministry Officer Interference Board Education ) आहे.
विद्यार्थ्यांच्या पालकांना कसे थांबवणार? -
भाजपा शिक्षण आघाडीचे प्रदेश सहसंयोजक अनिल बोरनारे म्हणाले की, शैक्षणिक वर्षाचा प्रारंभ, समाप्ती, दिवाळी आणि उन्हाळी सुट्ट्याबाबत राज्याचे शिक्षण संचालक दरवर्षी घोषणा करीत असतात. मात्र, शिक्षण उपसचिवांनी शाळांच्या वेळा व परीक्षांच्या बाबतीत दोन दिवसांपूर्वी परिपत्रक काढून राज्यभर गोंधळ व संभ्रम निर्माण केला आहे. स्थानिक परिस्थिती, पाण्याचा प्रश्न, लोडशेडिंग वाढत्या तापमानात एप्रिलमध्ये विद्यार्थी दिवसभर शाळेत बसतील कसे ? याचा साधा विचारही केलेला दिसत नाही. अनेक पालकांनी गावी जाण्यासाठी रेल्वे गाड्यांचे आरक्षण करून ठेवले असून, त्या पालकांना कसे थांबवणार, असा प्रश्न उपस्थित होत आहे.
शिक्षण विभागातील ढवळाढवळ थांबवा -
दिवाळीच्या सुट्टीची घोषणा स्वतः शिक्षण मंत्र्यांनी करून चुकीचा पायंडा पाडला होता. वास्तविकता हे अधिकार शिक्षण संचालकांना आहेत. संचालकांच्या घोषणेनंतर जिल्ह्याचे शिक्षण अधिकारी संघटनांसोबत सहविचार सभा घेऊन नवीन शैक्षणिक वर्ष व सुट्ट्यांचे नियोजन करुन शाळांना मार्गदर्शक सूचना करीत असतात. शाळा सुरळीत चालवण्यासाठी शिक्षण संचालक, एसएससी बोर्ड, शिक्षण आयुक्त आणि शिक्षणाधिकारी कार्यालय आहेत. त्यांच्या कामात ढवळाढवळ करण्यापेक्षा मंत्रालयातील अधिकाऱ्यांनी शिक्षकांचे विलंबाने होणारे वेतन वेळेवर न मिळाणारे वेतनेतर अनुदान शाळांना कसे मिळेल याकडे लक्ष द्यावे, असा सल्ला अनिल बोरणारे यांनी राज्य सरकारला दिला आहे.
हेही वाचा - People Beat Teacher : कोल्हापुरातील भुदरगड तालुक्यात गैरसमजुतीतून शिक्षकाला चोप दिल्याचा Video Viral
