मुंबई - पुण्यातील भोसरी एमआयडीसी जमीन गैरव्यवहार प्रकरणी ईडी कडुन एकनाथ खडसे यांची चौकशी करण्यात येत आहे. दरम्यान, एकनाथ खडसे यांनी मुंबई उच्च न्यायालयमध्ये ईडीकडून अटक होऊ नये, म्हणून याचिका दाखल केली आहे. या याचिकेत "आपण ईडीच्या तपासात सर्व प्रकारचे सहकार्य करत असून आपली चौकशी केली आहे. मात्र , चौकशी होत असताना अटक केली जाऊ नये," अशी याचिका एकनाथ खडसे यांच्याकडून दाखल करण्यात आली. यावर 28 जानेवारीपर्यंत सुनावणी तहकूब करण्यात आलेली आहे.
काय आहे प्रकरण-
तत्कालीन भाजप सरकारमध्ये महसूल मंत्री पदावर असलेल्या एकनाथ खडसे यांच्यावर पत्नी व जावयाकडून पुण्यातील भोसरी येथील एमआयडीसी परिसरातील जमीन व्यवहार करण्यात आला होता. यावर सामाजिक कार्यकर्त्या अंजली दमानिया यांनी एकनाथ खडसे यांच्यावर आरोप केले होते. मात्र, हा व्यवहार पूर्णपणे खाजगी जमिनीचा झालेला असून कायद्याच्या चौकटीत राहूनच पत्नी व जावयाकडून ही जमीन विकत घेतली गेल्याचा दावा एकनाथ खडसे यांनी केलेला होता. या अगोदर या संदर्भात 3 तपास यंत्रणांकडून एकनाथ खडसे यांना क्लीनचिट देण्यात आलेली असून आपण कुठलीही चुकीची गोष्ट केली नसल्याचे एकनाथ खडसे हे वारंवार सांगत आले आहेत.
राष्ट्रवादी काँग्रेस मध्ये प्रवेश आणि ईडी नोटीस-
राष्ट्रवादी काँग्रेसमध्ये प्रवेश करत असताना एकनाथ खडसे यांनी अगोदरच जाहीर केले होते. की तुम्ही माझ्या मागे ईडी लावली तर मी सीडी लावेल, असा इशारा त्यांनी त्यांच्या विरोधकांना दिलेला होता. या प्रकरणांमध्ये अंजली दमानिया यांनी सुरुवातीपासूनच एकनाथ खडसे यांच्या विरोधात गैरव्यवहारप्रकरणी आरोप केलेले आहेत.
हेही वाचा- प्रजासत्ताक दिनाच्या पूर्वसंध्येला राष्ट्रपतींचे भाषण, वाचा महत्वाचे मुद्दे...
