मुंबई - गवालिया टॅंक, नाना चौक येथील सचिनम हाईट्स (कमला) या इमारतीला २२ जानेवारीला आग लागली. या आगीत ३० जण जखमी झाले. या जखमींपैकी ८ जणांचा मृत्यू झाला होता. मसिना रुग्णालयात प्रकृती गंभीर असलेल्या रुग्णांचा आज सायंकाळी मृत्यू झाल्याने मृतांचा आकडा ९ वर पोहचला आहे. या घटनेतील ५ जणांची प्रकृती अद्यापही गंभीर आहे.
आगीतील ९ वा मृत्यू -
ताडदेव परिसरातील भाटिया रुग्णालय जवळ कमला इमारत आहे. २० मजली असलेल्या या इमारतीत १९ व्या मजल्यावर २२ जानेवारीला सकाळी साडे सातच्या सुमारास आग लागली. या आगीवर १३ फायर इंजिन, ८ जम्बो टॅंकर द्वारे दुपारी १२.३० च्या सुमारास नियंत्रण मिळवले. आग आणि धूर यामुळे इमारतीतील रहिवाशांना घरातून व व्हरांड्यातून बाहेर पडणे कठीण जात असल्याने अग्निशमन दलाने त्यांची सुटका करून रुग्णालयात दाखल केले. या घटनेत ३० जणांना भाटिया, कस्तुरबा, नायर, मसीना आदी रुग्णालयात दाखल केले असता त्यामधील ८ जणांचा मृत्यू झाला आहे. आज शुक्रवारी सायंकाळी ५.१५ च्या सुमारास मसीना रुग्णालयात दाखल असलेल्या धवल साळसकर वय २३ वर्षे याचा मृत्यू झाला. यामुळे मृतांचा आकडा ९ वर गेला आहे.
५ जण आजही गंभीर -
मुंबई महापालिकेच्या आपत्कालीन व्यवस्थापन विभागाकडून मिळालेल्या माहितीनुसार सचिनम हाईट्स (कमला) इमारत आगीत एकूण ३० जण जखमी झाले. त्यापैकी ९ जणांचा मृत्यू झाला आहे. १३ जणांना डिस्चार्ज देण्यात आला आहे. ८ जण अद्यापही रुग्णालयात असून त्यापैकी ५ जणांची प्रकृती गंभीर आहे तर ३ जणांची प्रकृती स्थिर आहे.
चौकशी समिती नियुक्त -
आगीच्या या घटनेची चौकशी करण्यासाठी महानगरपालिका आयुक्त डॉ. इकबाल सिंह चहल यांनी समिती नेमण्याचे आणि पंधरा दिवसांच्या आत दुर्घटनेचा अहवाल सादर करण्याचे निर्देश दिले आहेत. त्यानुसार महानगरपालिकेचे उप आयुक्त (परिमंडळ २) यांच्या अध्यक्षतेखाली चौकशी समिती स्थापन करण्यात आली आहे. या समितीमध्ये डी विभागाचे सहाय्यक आयुक्त, प्रमुख अभियंता (यांत्रिकी व विद्युत), उपप्रमुख अभियंता (इमारत प्रस्ताव) (शहर), उपप्रमुख अग्निशमन अधिकारी यांचा देखील समावेश आहे. आग लागल्याचे नेमके कारण, आग पसरून सहा नागरिकांचा मृत्यू होण्यामागील कारण आणि सदर इमारतीच्या मंजूर आराखड्यामध्ये कोणतेही विनापरवानगी बदल करण्यात आले असल्यास त्याची शहानिशा करणे या अनुषंगाने ही समिती चौकशी करणार आहे.
मृतांची नावे -
मीना मिस्त्री
मौसमी मिस्त्री
हितेश मिस्त्री
मंजूबेन कथारिया
पुरुषोत्तम चोपडेकर
अनोळखी मृतदेह
मनीष सिंग
माधुरी चोपडेकर
धवल साळसकर
हेही वाचा - Kamla building Fire Update : कमला इमारतीच्या आगीत ७ वा मृत्यू, ८ जण आजही गंभीर
