मुंबई- पंतप्रधान नरेंद्र मोदी यांनी मला काश्मीर प्रश्नावर भारत-पाकिस्तान यांच्यात मध्यस्थी करावी असे म्हटले होते, असे वक्तव्य अमेरिकेचे अध्यक्ष डोनाल्ड ट्रम्प यांनी केले होते. या वक्तव्याविरोधात मोदींनी आजपर्यंत काहीही प्रतिक्रिया दिलेली नाही. जर असे काही घडलेच नाही तर मोदी आता गप्प का? असा सवाल विचारत भारतीय कम्युनिस्ट पक्षातर्फे मुंबईत बीकेसी परिसरात निदर्शन आंदोलन करण्यात आले. हे आंदोलन वांद्रेच्या अमेरिकन कोन्सल्ट पर्यंत नेण्यात आले.
मोदींनी ट्रम्प यांना असे काही म्हटले नसेल तर त्यांनी तसे स्पष्ट सांगावे. पण मोदी गप्प का? ते ट्रम्प यांना घाबरतात का? असा सवाल भारतीय कम्युनिस्ट पक्षातर्फे विचारण्यात येतं आहे. मोदी यांनी काश्मीर प्रश्नी ट्रम्प यांना विचारणा केली असेल तर त्यांनी 1971 च्या भारत-पाकिस्तान युद्धात अमेरिका पाकिस्तानच्या बाजूने होती हे विसरू नये. अमेरिका हा साम्राज्यवादी देश आहे आणि या देशाचे धोरण हे भारतासाठी धोकादायक आहे. त्यामुळे ट्रम्प यांनी केलेले वक्तव्य हे देशासाठी धोकादायक आहे, असे पक्षातर्फे म्हणण्यात आले. यावेळी कम्युनिस्ट पक्षाच्या 500 कार्यकर्त्यांनी एकत्र येत या विरोधात निषेध केला.
