मुंबईत दहा दिवसांत २८१५ इमारती आणि मजले सील तर कंटेनमेंट झोनची संख्या २७वर

मागील १० दिवसांत ७९९ मजले, ८३ इमारती आणि १६ कंटेनमेंट झोनची वाढ झाली आहे. तर सद्यस्थितीत मुंबईत २२८ इमारती सील करण्यात आल्या आहेत. सील मजले-भागांची संख्या २८१५ झाली असून चाळी-झोपडपट्ट्यांमधील कंटेनमेंट झोनची संख्या २७वर पोहोचली आहे.

मुंबई - मुंबईत कोरोनाला वर्ष पूर्ण झाले असताना पुन्हा रुग्णसंख्या वाढू लागली आहे. सध्या मुंबईत आढळून येणाऱ्या रुग्णांपैकी ९० टक्के रुग्ण इमारतींमध्ये आहेत. त्यामुळे पालिकेने इमारतींवर अधिक लक्ष वेधले असून येथे नियमांची कडक अंमलबजावणीला सुरुवात केली आहे. मागील १० दिवसांत ७९९ मजले, ८३ इमारती आणि १६ कंटेनमेंट झोनची वाढ झाली आहे. तर सद्यस्थितीत मुंबईत २२८ इमारती सील करण्यात आल्या आहेत. सील मजले, भागांची संख्या २८१५ झाली असून चाळी-झोपडपट्ट्यांमधील कंटेनमेंट झोनची संख्या २७वर पोहोचली आहे.

इमारती सील

मुंबईत गेल्या वर्षी मार्चमध्ये कोरोनाविषाणूने शिरकाव केल्यानंतर इमारती, नंतर झोपडपट्ट्या आणि पुन्हा इमारतींकडे आपला मोर्चा वळवला होता. दाटीवाटीच्या चाळी-झोपडपट्ट्यांमध्ये कोरोनाचा प्रसार झपाट्याने झाला. आशियातील सर्वात मोठ्या धारावी झोपडपट्टीसह वरळी कोळीवाडा, मानखुर्द, गोवंडी, कुर्लासारख्या भागात कोरोनारुग्णांची वाढ होऊन या झोपडपट्ट्या ‘कोरोना हॉटस्पॉट’ जाहीर करण्यात आल्या. मोठ्या प्रयत्नांनंतर या ठिकाणचा कोरोना आटोक्यात आला. आता पुन्हा कोरोना रुग्णवाढ होत असताना चाळी-झोपडपट्ट्यांपेक्षा इमारतींमध्ये कोरोनारुग्ण जास्त आढळत आहेत. मागील १० दिवसांत ७९९ मजले, ८३ इमारती आणि १६ कंटेनमेंट झोनची वाढ झाली आहे. तर सद्यस्थितीत मुंबईत २२८ इमारती सील करण्यात आल्या आहेत. सील मजले-भागांची संख्या २८१५ झाली असून चाळी-झोपडपट्ट्यांमधील कंटेनमेंट झोनची संख्या २७वर पोहोचली आहे.

साडेसात लाख मुंबईकर कंटेनमेंट झोनमध्ये

इमारतीत पाच कोरोना पॉझिटिव्ह रुग्ण आढळल्यास संपूर्ण इमारत सील केली जाते आहे. तर २ पॉझिटिव्ह रुग्ण आढळल्यास तो मजला किंवा इमारतीचा भाग सील केला जातो आहे. सद्यस्थितीत चाळी-झोपडपट्ट्यांमधील कंटेनमेंट झोनमध्ये ४२ हजार घरांमधील १ लाख ७९ हजार रहिवासी कंटेनमेंट झोनमध्ये आहेत. तर इमारतींमधील ३७ हजार घरांमधील १ लाख ३६ हजार रहिवासी प्रतिबंधात (कंटेनमेंट झोन) आहेत. तर २८१५ मजले सील असल्याने तब्बल १ लाख ११ हजार घरांमधील ४ लाख ३५ हजार रहिवासी प्रतिबंधात आहेत. तिन्ही प्रकारात एकूण १ लाख ९० हजार घरांतील तब्बल ७ लाख ५० हजार मुंबईकर सध्या प्रतिबंधात आहेत.

कोरोना रोखण्यासाठी अशा होतायत उपाययोजना

सद्यस्थितीत आढळणार्‍या रुग्णांमध्ये ९० टक्के कोरोना रुग्ण इमारतींमधील असल्याचे समोर आल्यामुळे इमारतींमध्ये राहणार्‍या रहिवाशांसह ऑफिसमध्ये ये-जा करणारे, इमारतीत घरकाम करणार्‍या महिला, मजूर, वृत्तपत्र-दूध विक्रेते यांच्या चाचण्या करण्यात येत आहेत. सोसायटी पदाधिकार्‍यांच्या माध्यमातून घरी क्वारंटाइन असणार्‍यांवर नजर ठेवली जात असून नियम मोडणार्‍यांवर गुन्हे दाखल करण्यात येत आहेत. रुग्णाच्या निकट संपर्कातील लोकांमध्ये लक्षणे नसली तरी सातव्या दिवशी कोरोना चाचण्या करण्यात येत आहेत.