मुंबई - गंभीर कोरोना रुग्णांसाठी आवश्यक असणाऱ्या रेमडेसीविर इंजेक्शनचा पुन्हा एकदा राज्यात मोठ्या प्रमाणावर तुडवडा निर्माण झाला आहे. खुद्द आरोग्य मंत्री राजेश टोपे यांनीही काल जनता दरबारात याची कबुली दिली आहे. मात्र अन्न आणि औषध प्रशासनाने (एफडीए) आता रेमडेसीविरची तुडवडा दूर झाला असून पुरवठा सुरळीत झाल्याची माहिती 'ईटीव्ही भारत' ला दिली आहे. 'कालपर्यंत रेमडेसीविरचा तुडवडा होता हे खरे आहे. पण हा तुडवडा एका कंपनीच्या इंजेक्शनची एक बॅच सदोष निघाल्याने झाला होता. हे इंजेक्शन बाद ठरले आहेत. तर, एका कंपनीचा साठा पोहचण्यास काही अडचणी येत होत्या. त्यामुळे मागील चार-पाच दिवस तुडवडा निर्माण झाला होता. पण आता मात्र राज्यभर पुरवठा सुरळीत झाल्याचा दावा एफडीएने केला आहे.
कोरोनावर अजूनही रामबाण औषध आलेले नाही. असे असले तरी गंभीर रुग्णांना रेमडेसीविर इंजेक्शन दिले जात असून हे इंजेक्शन उपयोगी ठरत आहे. मात्र या इंजेक्शनची निर्मिती करणाऱ्या कंपन्या कमी असून ही इंजेक्शन महागडी आहेत. त्यामुळे सुरुवातीपासूनच या इंजेक्शनचा तुडवडा आणि काळाबाजार दिसून येतो. इंजेक्शनचा पुरवठा सुरळीत करत काळाबाजाराला आळा घालण्यासाठी एफडीएने विविध उपाययोजना केल्याचे सांगितले आहे. पण तरीही राज्यभर आजही रेमडेसीविरचा तुडवडाही आहे आणि काळाबाजारही सुरूच असल्याची चर्चा आहे. त्यात काल, बुधवारी टोपे यांनीच इंजेक्शनचा तुडवडा असल्याची कबुली जनता दरबारात दिली. महत्त्वाचे म्हणजे या जनता दरबारात अचानकपणे राष्ट्रवादी काँग्रेसचे अध्यक्ष शरद पवार आले. त्यानंतर त्यांनी याचा आढावा घेत स्वतः 1000 रेमडेसीविर इंजेक्शन उपलब्ध करून दिले.
हेही वाचा - सुशांत राजपूत प्रकरण : सिमॉन खंबाटा एनसीबीच्या कार्यालयात चौकशीसाठी हजर
या पार्श्वभूमीवर एफडीए आयुक्त अरुण उन्हाळे यांना विचारले असता त्यांनी आज कुठेही या इंजेक्शनचा तुडवडा नसल्याचे सांगितले आहे. आता इंजेक्शनचा पुरवठा सुरळीत सुरू असल्याचे ते म्हणाले. मात्र, त्याचवेळी मागील चार-पाच दिवस रेमडेसीविरचा राज्यात तुडवडा होता, पुरेसे इंजेक्शन उपलब्ध नव्हते असे एफडीएतील एका वरिष्ठ अधिकाऱ्याने सांगितले आहे. सिप्ला कंपनीच्या इंजेक्शनची एक बॅच सदोष निघाल्याने मोठ्या संख्येने इंजेक्शन परत करावी लागली. तर, दुसरीकडे हेट्रो कंपनीचा माल पोहोचण्यास वाहतुकीच्या अडथळ्यांच्या कारणांमुळे विलंब होत होता. पण या दोन्ही अडचणींवर कंपनीशी बोलून तोडगा काढत आता इंजेक्शनचा पुरवठा सुरळीत करण्यात आल्याची माहिती या अधिकाऱ्याने दिली आहे.
एफडीएचा हा दावा मात्र साफ खोटा असल्याचा आरोप अभय पांडे, अध्यक्ष ऑल फूड अँड ड्रग लायसन्स होल्डर्स फाऊंडेशन यांनी केला आहे. आजही सर्वत्र इंजेक्शनचा तुडवडा आहे. मोठी, कॉर्पोरेट रुग्णालये इंजेक्शनचा साठा करून ठेवत आहेत. त्यामुळे छोट्या रुग्णालयांना इंजेक्शन मिळत नसल्याचे चित्र आहे. त्याचवेळी विनाकारण साठा करणाऱ्या रुग्णालयाविरोधात एफडीए कोणतीही कारवाई करत असल्याने त्यांचे फावत असून यात गरीब रुग्ण भरडला जात असल्याचाही आरोप पांडे यांनी केला आहे. एफडीएने या प्रश्नाकडे गंभीर्याने लक्ष देण्याची गरज असल्याचे ही त्यांनी सांगितले आहे.
हेही वाचा - गृहप्रकल्पातील अनधिकृत बांधकाम पाडण्यासाठी आता महारेरा कळवणार संबंधित यंत्रणेला
