मुंबई - अंमलबजावणी संचालनालयाने अंडरवर्ल्ड डॉन दाऊद इब्राहिमचा ( Underworld Don Dawood Ibrahim ) भाऊ इक्बाल कासकरच्या कोठडीसाठी मुंबई सत्र न्यायालयात अर्ज दाखल केला ( ED Application On Mumbai Session Court ) आहे. त्यामुळे लवकरच अंमलबजावणी संचालनालय इक्बाल कासकरला ताब्यात घेऊन त्याची चौकशी करणार ( ED Arrest Iqbal Kaskar ) शक्यता आहे. त्यामुळे मोठे खुलासे होऊ शकतात.
इक्बाल कासकर हा सध्या न्यायालयीन कोठडीत आहे. यापुर्वीही एनसीबीने इक्बाल कासकरला ड्रग्ज प्रकरणात ताब्यात घेतले होते. याप्रकरणी आतापर्यंत चार ते पाच जणांची चौकशी करण्यात आली आहे. तर, आणखी काही जणांची चौकशी केली जाण्याची शक्यता आहे. तसेच, छोटा शकीलचा मेहुणा सलीम फ्रुटवाला याला सुद्धा अंमलबजावणी संचालनालयाने समन्स बजावले आहे. मात्र, अद्याप तो अंमलबजावणी संचालनालयन कार्यालयात पोहचला नाही.
हेही वाचा - Pune Rape Case : पुण्यात बांधकाम व्यावसियाकडून महिलेवर बलात्कार; गुन्हा दाखल
इक्बाल कासकरच्या चौकशीसाठी न्यायालयात अर्ज -
अंडरवर्ल्ड डॉन दाऊद इब्राहिमचा भाऊ इक्बाल कासकर याची तपासाकरिता ईडीने ठाणे न्यायालयात अर्ज दाखल केला असून, कोठडीची मागणी केली आहे. मंगळवारी मुंबईत अनेक ठिकाणी ईडीने मनी लॉन्ड्रिंग प्रकरणात छापेमारी केली होती. यानंतर आज दाऊद इब्राहिमच्या भावाची तपासाकरिता ईडीने कोठडी मागितल्याने आता यामध्ये अनेक नावं समोर येण्याची शक्यता वर्तवण्यात येत आहे.
पंजाबमध्ये अस्थिरता निर्माण करण्यासाठी पाकिस्तानी गुप्तचर एजेंसी आयएसआयने अंडरवर्ल्डचा आधार घेतला असल्याचे समोर आले होते. पंजाबमध्ये मुंबईवरून पैसे पाठवण्यात आले होते. त्यामध्ये मोठ्या प्रमाणात मनी लॉन्ड्रिंग झाल्याचे समोर आल्यानंतर या प्रकरणात NIA ने ईडीची मदत घेत मुंबईत अनेक ठिकाणी छापेमारी केली, अशी माहिती सूत्रांनी दिली आहे.
अनेक धागेदोरे हाती लागण्याची शक्यता -
केंद्रीय गृहमंत्रालयाने दाऊद इब्राहिमच्या तपासाचे सूत्र एनआयएकडे सोपवल्यानंतर, एनआयएने दाऊद इब्राहिम याच्या विरोधात गुन्हा दाखल केला होता. त्यानंतर या प्रकरणात अनेक गोष्टी समोर आल्यानंतर एनआयए आणि ईडीने काल मुंबईत छापेमारी केली होती. त्यामध्ये गँगस्टर अबू सलीमचा मेव्हणा सलीम फ्रुट याला चौकशीसाठी ईडीने ताब्यात घेतले होते. अनेक तासांच्या चौकशीनंतर ईडीने त्याला सोडून दिले होते. मात्र, काही कागदपत्र घेऊन सलीमला आज ईडी कार्यालयात बोलवले आहे. सलीम फ्रुट याच्याकडून अनेक बाबी समोर आल्याने आता हा तपास इक्बाल कासकरपर्यंत पोहोचला आहे.
दाऊद इब्राहिमची बहीण हसीना पारकर हिच्या घरीसुद्धा मंगळवारी ईडीने तपास केला आहे. दाऊद इब्राहिम याच्या संबंधित असलेल्या अनेक लोकांवर मंगळवारी ईडीने छापे टाकले असून, मुंबईत 9 तर ठाण्यात एका ठिकाणी ईडीने छापे टाकून तपास केला आहे.
