मुंबई - मुंबई महापालिकेतील मुख्य लिपिक, वरिष्ठ लेखा परीक्षक, लेखा सहाय्यक या पदांच्या कालबद्ध पदोन्नतीसाठी खात्यांतर्गत परीक्षा उत्तीर्ण होण्याची असलेली अट शिथिल करावी. तसेच, त्यांना कालबद्ध पदोन्नती देण्यात यावी यासह आदी मागण्यांसाठी आज शुक्रवारी (८ ऑक्टोबर) शेकडो लिपिकांनी आझाद मैदानात आंदोलन केले आहे. दि म्युनिसीपल युनियन आणि हिंदुस्थान कर्मचारी संघाच्या शिष्टमंडळाने पालिकेचे अतिरिक्त आयुक्त सुरेश काकाणी यांची भेट घेऊन मागण्यांचे निवेदन दिले. १८ ऑक्टोबरपर्यंत मागण्यांबाबत तोडगा निघाला नाही, तर बेमुदत संपावर जाण्याचा इशारा यावेळी कर्मचारी संघटनांनी दिला आहे.
बेमुदत संपाचा इशारा -
पदोन्नतीच्या पदासाठी खात्यांतर्गत परीक्षा उत्तीर्ण होण्याची अट रद्द करून विशेष प्रशिक्षण देऊन कर्मचाऱ्यांची नियुक्ती करावी, १०, २० व ३० वर्षांच्या सेवेनंतर कालबद्द पदोन्नती विनाअट पूर्वलक्षी प्रभावाने देण्यात यावी, प्रत्येक विभागातील आस्थापना विभागासाठी सॅप कन्सल्टंटची नेमणूक करावी आदी मागण्या कर्मचाऱ्यांच्या आहेत. शुक्रवारी शेकडो लिपीकीय कर्मचाऱ्यांनी आझाद मैदानात लॉंगमार्च काढून प्रशासनाचे लक्ष वेधले. दि. म्युनिसिपल युनियनचे अध्यक्ष शशांक राव, सरचिटणीस रमाकांत बने, हिंदुस्तान कर्मचारी संघाचे अध्यक्ष दिवाकर दळवी आदींनी कर्मचाऱ्यांना मार्गदर्शन केले. संघटनांचे शिष्टमंडळाने पालिका आयुक्त इकबाल सिंह चहल यांची भेट घेतली. यावेळी लिपिकीय संवर्गाच्या ३ हजाराहून अधिक कर्मचाऱ्यांनी स्वाक्षरी केलेले निवेदन सादर करण्यात आल्याचे रमाकांत बने यांनी सांगितले. कर्मचाऱ्यांच्या मागण्यांकडे दुर्लक्ष करण्यात येत असल्याने त्यांच्यात अंतोष आहे. त्यामुळे येत्या १८ ऑक्टोबरपर्यंत मागण्यांबाबत तोगडा न काढल्यास लिपिकीय संवर्गातील कर्मचारी बेमुदत संपावर जातील असा इशाराही संघटनांनी दिला आहे, अशी माहिती कामगार नेते शशांक राव यांनी दिली.
कर्मचारी संघटनांसोबत चर्चा
मुख्य लिपिक, वरिष्ठ लेखा परीक्षा व लेखा सहाय्यक या पदांच्या कालबद्ध पदोन्नतीसाठी खात्यांतर्गत परीक्षा उत्तीर्ण होण्याची असलेली अट शिथिल करून, त्यांना कालबद्ध पदोन्नती देण्याबाबत कर्मचारी संघटनांसोबत चर्चा करून सकारात्मक निर्णय घेण्यात येईल. प्रत्यक्ष पदोन्नतीसाठी परीक्षा घेण्याचा निर्णय चर्चेअंती झाल्यास, परीक्षेपूर्वी संबंधित उमेदवारांना आवश्यक ते प्रशिक्षण महापालिका देईल. त्याचप्रमाणे प्रत्यक्ष पदोन्नतीसाठी परीक्षा अभ्यासक्रमाचे व प्रश्नपत्रिकेचे प्रारूप व स्वरूप महापालिकाकेंद्री असण्याबाबत कर्मचारी संघटनांसोबत चर्चा करून निर्णय घेण्यात येईल, असे लिपिकीय कर्मचाऱ्यांच्या मागण्यांबाबत यापूर्वी ३ ऑगस्ट २०२१ रोजी अतिरिक्त आयुक्त (शहर) यांच्यासोबत चर्चा होऊन निर्णय घेण्यात आला आहे.
कामगार नेत्यांवर गुन्हे दाखल -
पालिका कर्मचाऱ्यांच्या मागण्याबाबत आंदोलन करणारे कामगार नेते शशांक राव, रमाकांत बने, दिवाकर दळवी, रंगनाथ सातवसे, देविदास लोखंडे यांच्यावर १८८ कलमांतर्गत गुन्हा दाखल करण्यात आला आहे. मुंबईत कोरोना विषाणूच्या प्रसारादरम्यान नियम तोडून गर्दी जमवून आंदोलन केल्याने, आझाद मैदान पोलीस ठाण्यात गुन्हा दाखल करण्यात आला आहे.
हेही वाचा - प्रियंका गांधींच्या संघर्षाने दिल्लीही झोपली नसावी, रोखठोक'मधून राऊतांचा भाजपवर हल्ला
