मुंबई - हृदयावरील सर्वात महत्वाची शस्त्रक्रिया म्हणून बायपास सर्जरी ओळखली जाते. हृदयात जाणारा रक्तपुरवठा नसांमध्ये ब्लॉकेज झाल्यास अडकते. रक्त हृदयात जाण्यास अडथळे येतात. कमी ब्लॉकेज असल्यास ऍन्जोप्लास्टी ही शस्त्रक्रिया केली जाते. तर जास्त ब्लॉकेज असल्यास बायपास ऑपरेशन करावे लागते. ऑपरेशन वेळेवर न झाल्यास हृदयाकडे जाणारा रक्तपुरवठा थांबल्यास रुग्णाचा मृत्यू होऊ शकतो. रुग्णाचा जीव वाचवण्यासाठी नागरिक रुग्णालयात धाव घेतात. डॉक्टरांनी आपल्या रुग्णावर उपचार करून त्याला दुसरे जीवन द्यावे अशी अपेक्षा नातेवाईकांना असते.
ऑपरेशनसाठी तारीख पे तारीख - बायपास शस्त्रक्रिया करणे आवश्यक आहे, असे काही रुग्ण मुंबई महापालिकेच्या नायर रुग्णालयात बायपास सर्जरीसाठी दाखल झाले आहेत. नायर रुग्णालयात आपल्यावर वेळेवर उपचार होतील आणि आपल्याला नवे जीवन मिळेल अशी अपेक्षा रुग्ण आणि नातेवाईकांची आहे. मात्र, नायर रुग्णालयात सीव्हीटीएस या वॉर्डमध्ये केवळ ४० बेड्स आहेत. या वॉर्डमध्ये प्रवेश मिळवण्यासाठी सुमारे २०० रुग्णांची प्रतीक्षा यादी आहे. यामुळे रुग्णांना बायपास ऑपरेशन करण्यासाठी तारखांवर तारखा दिल्या जात आहेत. या रुग्णांवर दिलेल्या तारखेला ऑपरेशन होईल याची शाश्वती डॉक्टरांकडून दिली जात नाही. तारखांना येऊन बेड्स खाली आहे का हे विचारून बघा असे सांगून नातेवाईकांना परत पाठवले जाते. यामुळे आपल्या रुग्णाचे ऑपरेशन होणार कि नाही याची भीती नातेवाईकाना सतावत आहे.
ऑपरेशन ऐवजी घरी जाण्याचे सल्ले - नायर रुग्णालयात एक रुग्ण २७ तारखेला ऍडमिट झाला आहे. त्याच्या कुटूंबियांनी आर्थिक अडचण असताना त्याला ऍम्ब्युलन्सने नालासोपारा येथून नायर मध्ये आणले आहे. सुरुवातीला त्यांना २१ ऑक्टोबरला बायपास ऑपरेशन करू असे सांगितले गेले. नंतर १२ ऑक्टोबरला तारीख देण्यात आली. या दिवशीही बेड्स खाली असले तरच ऑपरेशन होईल असे या रुग्णाच्या नातेवाईकांना सांगण्यात आले आहे. या रुग्णाच्या नातेवाईकांनी रुग्णालयाचे डीन डॉ. सारिखा पाटील यांच्याशी संपर्क केला, अतिरिक्त आयुक्त संजीव कुमार यांच्या कार्यालयातूनही डॉ. पाटील यांना मदत करण्याच्या सूचना दिल्या होत्या. त्यानंतरही रुग्णाला कोणताही दिलासा दिला नाही. उलट या रुग्णाला रुग्णालयातून डिस्चार्ज घेऊन घरी जाण्याचे सल्ले दिले जात आहेत.
डॉक्टर आणि बेड्सची कमतरता - दरम्यान याबाबत नायरच्या डीन डॉ. सारिका पाटील यांच्याशी संपर्क साधला असता दिवसाला १ किंवा २ बायपासची ऑपरेशन होतात. सीव्हीटीएस या वॉर्डमध्ये केवळ ४० बेड्स असून १०० ते २०० रुग्ण वेटिंगवर आहेत. बेडस आणि डॉक्टर यांची कमतरता असल्याने ऑपरेशनला वेळ लागत असल्याचे त्यांनी सांगितले.
