मुंबई - कोरोना संक्रमण थांबवण्यासाठी राज्य सरकारतर्फे वेगवेगळ्या उपाययोजना करण्यात आल्यानंतर यावर नियंत्रण मिळण्यामध्ये काही अंशी राज्य सरकारला यश आले आहे. राज्यात असलेल्या 47 कारागृहांमध्ये असलेल्या एकूण कैद्यांपैकी तब्बल 35, 357 कैद्यांची कोरोनाचाचणी घेण्यात आली होती. ज्यामध्ये 2505 कैदी हे बाधित झाल्यानंतर आतापर्यंत यापैकी 2470 कैदी कोरोनातून पूर्णपणे बरे झालेले आहेत. मात्र दुर्दैवाने आतापर्यंत 7 कैद्यांचा यामध्ये मृत्यू झालेला आहे. तर दुसरीकडे कारागृह कर्मचाऱ्यांची कोरोनाचाचणी सुद्धा घेण्यात आली होती ज्यामध्ये 545 कारागृह कर्मचाऱ्यांपैकी 532 कारागृह कर्मचारी हे कोरोनातून पूर्णपणे बरे झालेले आहेत. दुर्दैवाने आतापर्यंत 8 कारागृह कर्मचाऱ्यांचा मृत्यू झालेला आहे.
राज्यात 8 कारागृह कर्मचाऱ्यांचा मृत्यू
राज्यातील वाशिम जिल्हा कारागृह, अमरावती मध्य कारागृह, बोरसल कारागृह, बीड जिल्हा कारागृह, औरंगाबाद मध्य कारागृह, विसापूर मध्य कारागृह, येरवडा मध्य कारागृह, तळोजा मध्य कारागृह, या ठिकाणी प्रत्येकी 1 कारागृह कर्मचाऱ्याचा मृत्यू झाला आहे.
7 कारागृह कैद्यांचा मृत्यू
तळोजा मध्य कारागृहातील 2 कारागृह कैद्यांचा मृत्यू झाला असून पुण्यातील येरवडा कारागृहातील 2 कैद्यांचा मृत्यू झाला आहे. याबरोबरच सोलापूर जिल्हा कारागृहातील 1 कैद्याचा मृत्यू झाला असून धुळे जिल्हा कारागृहात 1 कैद्याचा तर अमरावती मध्य कारागृहात 1 कैद्याचा मृत्यू झाला आहे.
'या' कारागृहात सर्वाधिक कोरोनाचाचण्या
मुंबई मध्यवर्ती कारागृहात तब्बल 1713 कैद्यांच्या कोरोना चाचण्या झाल्या असून ठाणे मध्यवर्ती कारागृहात 1567 कैदी, तळोजा मध्यवर्ती कारागृहात 4266 कैद्यांच्या कोरोणा चाचण्या करण्यात आलेल्या आहेत. मुंबईतील महिला कारागृहातील 272 महिला कैद्यांच्या चाचण्या घेण्यात आल्या आहेत. कल्याण जिल्हा कारागृहात 2857 कैद्यांच्या कोरोना चाचण्या घेण्यात आल्या असून, पुण्यातील येरवडा मध्यवर्ती कारागृहात सर्वाधिक 5016 कैद्यांच्या चाचण्या घेण्यात आलेल्या आहेत. औरंगाबाद मध्यवर्ती कारागृहात 1888, नाशिक मध्यवर्ती कारागृहात 2135 कैद्यांच्या चाचण्या घेण्यात आल्या आहेत.
राज्यातील एकूण कारागृहात 23, 217 कैदी ठेवण्याची क्षमता असताना सध्याच्या घडीला 30, 701 कैदी ठेवण्यात आलेले आहेत.
पश्चिम कारागृह विभाग
राज्यात पुण्यातील येरवडा कारागृहामध्ये 2449 कैद्यांची क्षमता असून आताच्या घडीला 5213 कैदी या ठिकाणी ठेवण्यात आलेले आहेत. सातारा जिल्हा कारागृहाची क्षमता 168 कैद्यांची असताना या ठिकाणी 379 कैदी ठेवण्यात आले आहेत. सांगली जिल्हा कारागृहात कैद्याची क्षमता 235 असताना या ठिकाणी 368 कैद्यांना ठेवण्यात आले आहेत. कोल्हापूर जिल्हा कारागृहाची क्षमता 125 कैद्यांची असताना या ठिकाणी 177 कैदी असून अहमदनगर जिल्हा कारागृहात 69 कायद्यांची क्षमता असताना या ठिकाणी 105 कैदी ठेवण्यात आलेले आहेत.
दक्षिण कारागृह विभाग
मुंबई मध्यवर्ती कारागृहाची क्षमता ही 804 कैद्यांची असताना या ठिकाणी 1665 कैदी ठेवण्यात आलेले आहेत. तर ठाणे मध्यवर्ती कारागृह त्यांची क्षमता 1105 असताना या ठिकाणी 2523 कैद्यांना ठेवण्यात आलेले आहे. तळोजा मध्यवर्ती कारागृह त्यांची क्षमता 2124 कैद्यांची असून या ठिकाणी आत्ताच्या घडीला 4390 कैदी ठेवण्यात आले असून कल्याण जिल्हा कारागृहातील 540 कैद्यांची क्षमता असताना या ठिकाणी 1674 कैदी ठेवण्यात आलेले आहेत.
पूर्व कारागृह विभाग
नागपूर मध्यवर्ती कारागृहांची कैद्यांची क्षमता 1810 कैद्यांची असताना या ठिकाणी 2221 कैदी असून अमरावतीमध्ये कारागृहाची कैद्यांची क्षमता 943 असून या ठिकाणी 993 कैद्यांना ठेवण्यात आलेला आहे. बुलडाणा जिल्हा कारागृहात 101 कैदी ठेवण्याची क्षमता असताना 205 कैदी असून यवतमाळ जिल्हा कारागृहाची 229 कैद्यांची क्षमता असताना या ठिकाणी 282 कैदी आहेत. तर चंद्रपूर जिल्हा कारागृहाची 333 कैद्यांची क्षमता असतानाही अधिकारी 481 कैदी ठेवण्यात आलेले आहेत.
मध्य कारागृह विभाग
औरंगाबाद मध्य कारागृहाची क्षमता 539 कैद्यांची असताना या ठिकाणी 1290 कैदी असून, नांदेड जिल्हा कारागृहात 135 कैदी ठेवण्याची जागी 177 कैदी ठेवण्यात आलेले आहेत. परभणी जिल्हा कारागृह 252 कैदी क्षमता असताना मात्र या ठिकाणी 297 कैदी असून बीड जिल्हा कारागृहात 161 कैद्यांच्या ऐवजी 220 कैद्यांना ठेवण्यात आलेले आहे. तर जळगाव जिल्हा कारागृहात 200 कैद्यांची क्षमता असताना या ठिकाणी 312 कैदी सध्याच्या घडीला ठेवण्यात आलेले आहेत.
