मुंबई - अत्यावश्यक सेवेसाठी मुंबईत लोकलने प्रवास करणाऱ्यांसाठी दिलासादायक बातमी आहे. सोशल डिस्टन्सिंग कायम ठेवण्यासाठी व गर्दी टाळण्यासाठी मध्य रेल्वेने 19 ऑक्टोबर पासून दररोजच्या विशेष उपनगरी सेवांची संख्येत 225 उपनगरीय गाड्या वाढविण्याचा निर्णय घेतला आहे. यामुळे मध्य रेल्वे गाड्यांची एकूण संख्या 706 इतकी होणार आहे.
राज्य सरकारने अधिसूचित केलेल्या आणि रेल्वे मंत्रालयाने मंजूर केल्यानुसार मध्य रेल्वे सध्या अत्यावश्यक सेवेतील कर्मचार्‍यांसाठी 481 विशेष उपनगरी सेवा चालवित आहे.
मुख्य मार्गावर (मेन लाइन) 499 गाड्या धावत आहेत. त्यात धिम्या मार्गावर 309 आणि जलद मार्गावर 190 फेऱ्या होत आहेत. तर हार्बर लाइनवर 187, ट्रान्सहार्बर लाइनवर 20 फेऱ्या सुरू आहेत. रेल्वेंची संख्या वाढविल्याने मध्य व हार्बर मार्गावरील प्रवाशांना मोठा दिलासा मिळणार आहे.
महिलांना लोकलमध्ये प्रवेश देण्यास रेल्वेचा रेड सिग्नल-
राज्य शासनाकडून महिलांना लोकल ट्रेनमध्ये प्रवास करण्याची परवानगी देण्यात आली. मात्र, रेल्वे विभाग व केंद्र शासनाकडून अद्यापही स्पष्टीकरण दिलेले नाही. नवरात्रीत महिलांना सन्मानपूर्ण वागणूक द्यावी, अशी भूमिका भाजपची दिसून येत नाही, अशी टीका राज्याचे मदत व पुनर्वसन मंत्री विजय वडेट्टीवार यांनी शुक्रवारी केली आहे.
