मुंबई - ओबीसी जातीच्या जनगणनेला केंद्र सरकारने विरोध केल्याने विधानसभेत गदारोळ झाला होता. असे असतानाच केंद्रीय सामाजिक न्याय मंत्री रामदास आठवले यांनी मात्र, जातीनिहाय जनगणनेच्या पक्षात मत व्यक्त केले आहे.
केवळ इतर मागास वर्गीय अर्थात ओबीसी नाही, तर सर्वच जातींची जनगणना झाली पाहिजे, असे आठवले यांनी म्हटले आहे. विधानभवन पत्रकार कक्षात रामदास आठवले बोलत होते.
हेही वाचा... निष्ठेला सलाम ! आठ महिन्याच्या गर्भवती असूनही नमिता मुंदडा मतदार संघाच्या प्रश्नांसाठी विधानसभेत
ओबीसीची जनगणना केल्यास जातीवादाला खतपाणी मिळेल, अशी भीती बाळगण्याची कोणतीही गरज नाही. जातीची जनगणना झाल्यास त्या संबंधित जातीसाठी आवश्यक त्या उपयाययोजना करणे अधिक सोपे होणार असल्याचे त्यांनी सांगितले. अशा प्रकारे जातनिहाय जनगणना व्हावी, यासाठी पंतप्रधान नरेंद्र मोदी यांना पत्र लिहणार असल्याचे आठवले यांनी सांगितले.
काँग्रेस आणि राष्ट्रवादी शिवसेनेला अडचणीत आणत आहेत...
राज्यात पुन्हा एकदा मुस्लीम आरक्षणाचा मुद्यावर जोरदार चर्चा होत आहे. आरक्षणाला विरोध करणारी शिवसेना ही मुस्लीम आरक्षणाला समर्थन देत असल्याचे चित्र आहे. शिवसेनेच्या विचारधारेच्या विरोधात काँग्रेस आणि राष्ट्रवादी भूमिका घेत असल्याने हे पक्ष शिवसेनेला अडचणीत आणत असल्याचे रामदास आठवले यांनी म्हटले आहे.
दिल्लीतल्या दंगलीला केंद्र सरकार जबाबदार नाही...
राजधानी दिल्लीत झालेल्या दंगलीला केंद्र सरकार जबाबदार नाही. मात्र, काँग्रेस यात राजकारण करत असल्याचा आरोप रामदास आठवले यांनी केला आहे. आता दिल्लीत स्थिती नियंत्रणात आली आहे. मात्र, काँग्रेस आणि आम आदमी पक्ष यात राजकारण करून स्थिती बिघडवत आहे. दिल्लीतील सुरक्षा व्यवस्थेने आपली भूमिका चोख बजावावी असेही त्यांनी सांगितले.
