मुंबई - देशाच्या आर्थिक राजधानीत कोरोनाचे रुग्ण पुन्हा वाढण्यास सुरुवात झाली आहे. या पार्श्वभूमीवर मुंबई महापालिकेने कठोर पाऊले उचलण्यास सुरुवात केली आहे. विना मास्क फिरणाऱ्या नागरिकांवर कारवाईसाठी झोपडपट्टी भागात पोलीस व्हॅनमध्ये पालिका पथकाची नियुक्ती करण्यात आल्याची माहिती पालिकेचे अतिरिक्त आयुक्त सुरेश काकाणी यांनी दिली.
मुंबईत मार्चपासून कोरोना विषाणूचा प्रादुर्भाव सुरू झाला आहे. झोपडपट्टी विभागात कोरोनाचा प्रसार मोठ्या प्रमाणात झाला होता. कोरोनापासून वाचण्यासाठी सामाजिक अंतर ठेवणे व तोंडावर मास्क लावणे बंधनकारक करण्यात आले आहे. मात्र, त्यानंतरही अनेक मुंबईकर मास्क लावताना दिसत नाहीत. यासाठी महापालिकेने यापूर्वीच 'मिशन झोपडपट्टी' सुरू केले आहे.
पोलीस व पालिकेची संयुक्त कारवाई -
सामाजिक अंतर, तोंडावर मास्क, हात स्वच्छ धुणे, गर्दीत जाणे टाळणे याबाबत लोकांमध्ये सतत जनजागृती केल्याने मुंबईकरांनी सहकार्य करत पालिकेच्या सूचनांचे पालन केले आहे. परंतु झोपडपट्टीतील काही भागात आजही लोक विना मास्क घराबाहेर पडत असल्याच्या तक्रारी पालिकेकडे करण्यात आल्या आहेत. त्यामुळे यापुढे झोपडपट्टीतील काही भागात लोक विना मास्क फिरतात यांच्यावर पोलिसांच्या सहकार्याने कारवाई करण्यात येणार आहे. यासाठी पालिकेचे पथक पोलीस व्हॅनमध्ये पोलिसांबरोबर असणार आहेत, अशी माहिती मुंबई पालिकेचे अतिरिक्त आयुक्त सुरेश काकाणी दिली.
हेही वाचा-मुंबईकरांनो काळजी घ्या.. मुंबईत कोरोनाची स्थिती चिंताजनक, वाढतोय कोरोनाबाधितांचा आकडा
आतापर्यंत ३ लाख ९८ हजार लोकांवर कारवाई!
विना मास्क घराबाहेर पडणाऱ्यांवर कारवाईची मोहीम हाती घेतली आहे. यासाठी पालिकेच्या २४ वॉर्डापैकी प्रत्येक वॉर्डात ९० जणांची टीम कार्यरत आहेत. महापालिकेने ३ लाख ९८ हजार ८२४ लोकांवर कारवाई केली. या कारवाईमधून ८ कोटी ३३ लाख ७६ हजार रुपये दंड वसूल करण्यात आल्याचे काकाणी यांनी सांगितले.
हेही वाचा-मुंबईत सलग तिसऱ्या दिवशी कोरोनाचे हजाराहून अधिक रुग्ण; 19 रुग्णांचा मृत्यू
झोपडपट्टीत कोरोना संसर्गाची भीती -
मुंबईत मार्चमध्ये इमारतीत कोरोनाचा रुग्ण आढळून येत होते. इमारतींमध्ये काम करणाऱ्या कामगारांमुळे कोरोनाचा प्रसार झोपडपट्टीत झाला. धारावी, वरळी या विभागातील मोठ्या प्रमाणात झोपडपट्ट्या आहेत. दाटीवाटीने असलेली घरे, सार्वजनिक शौचालये, सामाजिक अंतर नसल्याने झोपडपट्टीत कोरोनाचा प्रसार मोठ्या प्रमाणात झाला होता. झोपडपट्टीतील कोरोना संसर्गाने पालिकेची डोकेदुखी झाली होती. धारावीसारखा पॅटर्न राबवून कोरोनाचा प्रसार रोखण्यात पालिकेला यश आले आहे.
हेही वाचा-कोरोनाची लाट नव्हे सुनामी येणार, लॉकडाऊनचा निर्णय घ्यायला भाग पाडू नका - मुख्यमंत्री
कोरोनाचे प्रमाण पुन्हा वाढण्याची भीती-
मुंबईतील सध्या कोरोनाची परिस्थिती हळूहळू वाढताना दिसत आहे. कोरोनाच्या जाळ्यात पुन्हा मुंबईकर असे चित्र या काही दिवसात दिसत आहे. आटोक्यात आलेला कोरोना पुन्हा हाताबाहेर जाण्याची शक्यता तज्ज्ञ सांगत आहेत. रविवारीच्या आकेवारीनुसार २४ तासात १,०९१ नवीन पॉझिटिव्ह रुग्ण आढळले आहेत. तसेच २४ तासात १७ जणांचा मृत्यू झाला आहे. जरी दिवाळी नंतर कोरोना वाढत असला तरी पालिकेची कोरोनाला दोन हात करण्यासाठी पालिका संपूर्ण सज्ज आहे. लोकांनी वाटेल तसे वागू नये. नागरिकांनी देखील स्वतःची काळजी घ्यावी, असे आवाहन मुंबई महापालिकेच्या महापौर किशोरी पेडणेकर यांनी नुकतेच केले आहे.
