मुंबई - मुंबई महापालिकेने केंद्रीय मंत्री नारायण राणे यांना एक नोटीस बजावली आहे. त्यात जुहू येथील अधीश बंगल्यातील अनधिकृत बांधकाम 15 दिवसांत ( Juhu Bungalow Illegal Alterations ) हटवावे. अन्यथा त्यावर पालिकेतर्फे कारवाई करण्यात येईल, असे नमूद करण्यात आले ( BMC Issue Notice Narayan Rane ) आहे. त्यामुळे महापालिका निवडणुकीपूर्वी नारायण राणे आणि शिवसेनेत वाद आणखी चिघळण्याची शक्यता आहे.
कायदेशीर कारवाई करण्याचा इशारा
मुंबई महापालिकेच्या के-पश्चिम वॉर्ड (अंधेरी पश्चिम) च्या अधिकाऱ्यांनी नारायण राणे यांच्या जुहू तारा रोड येथील अधीश बंगल्यात फेब्रुवारी महिन्यात जाऊन मोजमाप केले होते. त्यात राणे यांनी बंगल्यात बेकायदेशीर बदल केल्याचे समोर आले आहे. त्यानुसार पालिकेने राणे यांना नुकतीच 351 कलमानुसार नोटीस दिली होती. या नोटीसीत बांधकाम करताना दिलेल्या प्लॅनमध्ये बदल करण्यात आले आहेत. पार्किंग, बेसमेंट आणि स्टोर रूमच्या जागेत रहिवाशी बांधकाम करण्यात आले आहे.
पहिला, दुसरा, तिसऱ्या, पाचव्या माळ्यावरील टेरेसचा जागी रहिवाशी बांधकाम करण्यात आले आहे. चौथ्या, सहाव्या आठव्या माळ्यावरील पॉकेट टेरेसचा जागी रहिवाशी बांधकाम करण्यात आले आहे. हे बांधकाम पालिकेच्या परवानगी शिवाय केले असल्याने ते बेकायदेशीर आहे. यामुळे बेकायदेशीर करण्यात आलेले बांधकाम स्वत:हून काढावे अन्यथा पालिका कायदेशीर कारवाई करेल, असे नोटीस मध्ये म्हटले होते.
बंगल्यावर पालिका तोडक कारवाई करणार
पालिकेने आता पुन्हा राणे यांना बंगल्यातील अनधिकृत बांधकाम येत्या १५ दिवसांत हटवण्याचे आदेश दिले आहेत. हे अनधिकृत बांधकाम राणे यांनी न काढल्यास महापालिकेच्या कलम ४७५ अ च्या अंतर्गत पाडण्यात येईल, असे नोटिसीत म्हटले आहे. पालिकेने राणे यांना १५ दिवसांची मुदत दिली आहे. या मुदतीत बेकायदेशीर बांधकाम हटवण्यात आले नाहीतर, पालिकेचा हातोडा अधीश बंगल्यावर पडणार आहे.
हेही वाचा - Shambhuraj Desai Reaction : फडणवीसांची चौकशी राज्याच्या हितासाठीच - गृहराज्यमंत्री
