मुंबई - 'तौक्ते' चक्रीवादळाच्या पार्श्वभूमीवर 15 मे पासून बीकेसी, दहिसर आणि मुलुंड कोविड सेंटर बंद आहे. हे सेंटर 1 जूनला सुरू होईल, असे जाहीर करण्यात आले होते. पण हे सेंटर अजून सुरू झालेले नाही. तर आता हे सेंटर सुरू होण्यासाठी सोमवारचा मुहूर्त सांगितला जात आहे. सोमवारपासून या सेंटरमध्ये रुग्ण दाखल करून घेतले जातील आणि त्यामुळे पालिका रुग्णालयावरील ताण कमी होऊन नॉन कोविड रुग्णांकडे लक्ष देता येईल असे म्हटले जात आहे.
वादळाचा धोका लक्षात घेता रुग्णांना हलवले
बीकेसी, दहिसर आणि मुलुंड कोविड सेंटरमध्ये पाणी सचण्याच्या घटना पावसाळ्यात घडतात. अशावेळी चक्रीवादळात मुसळधार पाऊस आणि वारे सुटण्याची शक्यता असते. तेव्हा 15 मे रोजीच मुंबई पालिकेने या तिन्ही सेंटरमधील रुग्णांना इतरत्र हलवले. त्यानंतर वादळात सेंटरचे काही प्रमाणात नुकसान झाले. त्यामुळे कोविड सेंटर डागडुजीसाठी 15 दिवस बंद ठेवण्यात आले. तर 1 जूनला कोविड सेंटर सुरू होईल, असे सांगण्यात आले. पण अजूनही ही तिन्ही सेंटर सुरू झालेले नाहीत.
