मुंबई - मुंबईमध्ये वर्षभरापासून कोरोनाचा प्रसार आहे. 0फेब्रुवारीपासून पुन्हा रुग्णसंख्या वाढू लागले आहेत. काल १८ मार्चला वर्षभरातील सर्वाधिक २८७७ रुग्ण आढळून आले आहेत. त्याचप्रमाणे सक्रिय रुग्णांच्या संख्येत वाढ झाली आहे. १७ मार्चपर्यंत १६ हजार ७५१ सक्रिय रुग्णांची नोंद झाली आहे. मुंबई महापालिकेच्या २४ विभागापैकी अंधेरी पश्चिम येथे सर्वाधिक म्हणजेच १६३५ सक्रिय रुग्ण आहेत. तर बोरिवली, अंधेरी पूर्व, कांदिवली, मुलुंडमध्ये प्रत्येकी एक हजाराहून अधिक सक्रिय रुग्ण असल्याने हे विभाग कोरोनाचे नवे हॉटस्पॉट बनले आहेत. १२ विभागात ५०० हुन अधिक सक्रिय रुग्ण आहेत. ६ विभागात ५०० हुन कमी सक्रिय रुग्ण आहेत.
दीड महिन्यात १३ हजार सक्रिय रुग्ण वाढले -
मुंबईत गेल्या (2020) मार्चपासून कोरोना विषाणूचा प्रसार आहे. हा प्रसार काही प्रमाणात कमी होत असतानाच पुन्हा कोरोनाने डोके वर काढले आहे. १ फेब्रुवारीपासून कोरोना रुग्णांची संख्या वाढू लागली आहे. याआधी मुंबईत गेल्यावर्षी ७ ऑक्टोबरला २८४८ तर ८ ऑक्टोबरला २८२३ रुग्णांची नोंद झाली होती. काल १८ मार्चला वर्षभरातील सर्वाधिक २८७७ रुग्ण आढळून आले आहेत. त्याचप्रमाणे सक्रिय रुग्णांच्या संख्येत वाढ झाली आहे. १ फेब्रुवारीला ५६५६ सक्रिय रुग्ण होते. २८ फेब्रुवारीला त्यात वाढ होऊन ९७१५ सक्रिय रुग्णांची नोंद झाली. १८ मार्च रोजी सक्रिय रुग्णांचा आकडा १८ हजार ४२४ वर पोहचला आहे. गेल्या दिड महिन्यात सुमारे १३ हजार सक्रिय रुग्णांच्या संख्येत वाढ झाली आहे.
१ हजाराहून अधिक रुग्ण असलेले विभाग -
अंधेरी पश्चिम येथील के वेस्ट येथे १६३५, बोरिवली येथील आर सेंट्रल विभागात ११११, कांदिवली आर साऊथ येथे १०३४, अंधेरी पूर्व के ईस्ट येथे १०७४, मुलुंड टी विभाग येथे ११३२ सक्रिय रुग्ण आहेत.
५०० हुन अधिक रुग्ण असलेले विभाग -
मालाड पी नॉर्थ येथे ८७७, घाटकोपर एन विभाग येथे ९०२, भांडुप एस विभाग येथे ८५०, दादर जी नॉर्थ येथे ५४०, ग्रॅंटरोड डी विभाग येथे ६५७, गोरेगाव पी साऊथ येथे ८११, माटुंगा एफ नॉर्थ येथे ८१९, कुर्ला एल विभाग येथे ७०६, बांद्रा एच वेस्ट ७६८, खार एच ईस्ट येथे ५३९, चेंबूर एम वेस्ट येथे ७५५, मानखुर्द गोवंडी एम ईस्ट येथे ५९६ सक्रिय रुग्ण आहेत.
५०० हुन कमी रुग्ण असलेले विभाग -
परेल एफ साऊथ येथे ३११, एल्फिस्टन जी साऊथ येथे ४३३, दहिसर आर नॉर्थ येथे ३८०, फोर्ट कुलाबा ए विभाग येथे २४८, मरिन लाईन्स सी विभाग येथे ११५, सँडहर्स्ट रोड बी विभाग येथे ६८ सक्रिय रुग्ण आहेत.
वर्षभरातील सर्वाधिक रुग्ण आज -
मुंबईत काल १८ मार्चला वर्षभरातील सर्वात सर्वाधिक म्हणजेच २८७७ रुग्णांची नोंद झाली आहे. यामुळे कोरोनाग्रस्तांचा आकडा ३ लाख ५२ हजार ८३५ वर पोहचला आहे. मृतांचा आकडा ११ हजार ५५५ वर पोहचला आहे. रुग्ण बरे होण्याची संख्या ३ लाख २१ हजार ९४७ वर पोहचली आहे. मुंबईत सध्या १८ हजार ४२४ सक्रिय रुग्ण आहेत. रुग्ण बरे होण्याचे प्रमाण ९१ टक्के असून रुग्ण दुप्पटीचा कालावधी १३६ दिवस इतका आहे. कोरोना रुग्णांचा शोध घेण्यासाठी आतापर्यंत ३६ लाख ३७ हजार ९३० चाचण्या करण्यात आल्या आहेत, अशी माहिती पालिकेच्या आरोग्य विभागाने दिली.
७ लाख ६८ हजार लाभार्थ्यांना लस -
मुंबईत काल १८ मार्चपर्यंत एकूण ७ लाख ६८ हजार २६१ लाभार्थ्यांना लस देण्यात आली. त्यात ६ लाख ६९ हजार ४५० लाभार्थ्यांना पहिला तर ९८ हजार ८११ लाभार्थ्यांना दुसरा डोस देण्यात आला. कालपर्यंत एकूण २ लाख १० हजार ०८१ आरोग्य कर्मचारी, १ लाख ५६ हजार ४९३ फ्रंटलाईन वर्कर, ३ लाख ५१ हजार ७६७ जेष्ठ नागरिक तर ४५ ते ५९ वर्षामधील गंभीर आजार असलेल्या ४९ हजार ९२० लाभार्थ्यांना लस देण्यात आली.
पालिका सज्ज -
लॉकडाऊनमध्ये शिथिलता दिल्याने सर्वच ठिकाणी गर्दी वाढू लागली आहे. या गर्दीमुळे कोरोनाचा प्रसार होत आहे. रुग्ण शोधण्यासाठी चाचण्यांची संखय धावण्यात आली आहे. मुंबईत आढळून येणाऱ्या रुग्णसंख्येत आणि सक्रिय रुग्णांच्या संख्येत वाढ होत आहे. मात्र आढळून येणाऱ्या रुग्णांपैकी ९७ टक्के रुग्ण हे लक्षणे नसलेले आहेत. यासाठी त्यांना घरी किंवा कोरोना सेंटर येथे क्वारंटाईन करण्यात आले आहे. जे रुग्ण क्वारंटाईन नियमांचे पालन करत नाहीत त्यांच्यावर गुन्हे दाखल करण्याचे आदेश देण्यात आले आहेत. मुंबईत रुग्णसंख्या वाढत असली तरी रुग्णालय आणि कोरोना सेंटरमध्ये ६० टक्क्याहून अधिक खाटा रिक्त आहेत. रुग्णांवर उपचार करण्यास मुंबई महापालिका सज्ज आहे, अशी माहिती महापालिकेच्या वरिष्ठ अधिकाऱ्यांनी दिली.
हेही वाचा- कोरोना कहर.. खासगी व सरकारी कार्यालयांमध्ये ५० टक्के कर्मचाऱ्यांची उपस्थिती, सरकारचे आदेश
