मुंबई - शिवसेनेत उभी फूट पडल्यानंतर महाराष्ट्र नवनिर्माण सेनेचे अध्यक्ष राज ठाकरे प्रत्येकवेळी आपल्या कार्यकर्त्यांना 'महाराष्ट्रात जी काही सध्या परिस्थिती आहे त्याकडे एक संधी म्हणून बघा' असे वेळोवेळी आवाहन करत असतात. (Raj visit to Maharashtra) त्या दृष्टीने पक्ष मजबूत करण्यासाठी आता स्वतः राज ठाकरे मैदानात उतरले आहेत. काही दिवसांपूर्वीच त्यांनी सात दिवसांचा विदर्भ दौरा केला. त्यानंतर आता राज ठाकरे कोकण दौऱ्याला जाणार आहेत. त्यांचा हा दौरा साधारण ऑक्टोबरच्या दुसऱ्या आठवड्यात सुरू होणार असून सहा दिवस ते कोकणात विविध पदाधिकाऱ्यांची चर्चा करणार आहेत.
असा असेल राज ठाकरे यांचा कोकण दौरा - या कोकण दौऱ्याची सुरुवात राज ठाकरे तळ कोकणापासून करणार असल्याची माहिती मिळत आहे. कोल्हापूर मार्गे राज ठाकरे तळ कोकणात प्रवेश करतील. त्यानंतर सिंधुदुर्ग, रत्नागिरी, रायगड या तीन जिल्ह्यात प्रत्येकी दोन दिवस वेळ देऊन राज ठाकरे इथल्या स्थानिक पदाधिकाऱ्यांची संवाद साधतील. त्यावेळी अनेकांच्या मनसेत प्रवेश देखील होणार असल्याची माहिती मनसेच्या पदाधिकाऱ्यांकडून देण्यात आली आहे.
शिवसेनेच्या उगमस्थानात मनसे - शिवसेनेचा जन्मच मुळात कोकणातून आणि कोकणी माणसांमुळे झाला आहे. आज देखील शिवसेनेत जितके काही पदाधिकारी खासदार, आमदार, नगरसेवक आहेत त्यातले बहुतांश हे कोकणी आहेत. याच कोकणात शिवसेनेत सर्वाधिक बंडखोरी झाल्याने मनसे याकडे एक संधी म्हणून पहात असल्याचे आपल्या लक्षात येईल. त्यामुळे शिवसेनेच्या उगम स्थानात मनसेला खरंच पाय रोवता येतील का? हे देखील पाहणे महत्त्वाचे आहे.
मनसे पूर्ण ताकदीने मैदानात - मिळालेल्या माहितीनुसार, राज ठाकरे त्यांच्या पक्षाला संघटनात्मकदृष्ट्या मजबूत करण्यासोबतच शिवसेनेसह महाविकास आघाडीला धक्का देण्याची तयारी राज ठाकरेंनी केली आहे. स्थानिक स्वायत्त संस्थांमध्ये भाजप आणि मनसे एकत्र येणार की नाही, याबाबत अद्याप निर्णय झालेला नाही. मात्र, मनपाच्या आगामी निवडणुकीत भाजप आणि मनसे एकत्र लढणार असल्याचे मानले जात आहे. तसेच, आगामी निवडणुकांमध्ये मनसे पूर्ण ताकदीने उतरणार असल्याची माहिती मनसे नेत्यांनी दिली आहे.
मनसेत इनकमिंग - मिळालेल्या माहितीनुसार, मनसे अध्यक्ष राज ठाकरे यांच्या या दौऱ्यात एकीकडे त्यांच्या पक्षातील सर्व प्रमुख पदाधिकारी आणि कार्यकर्त्यांशी बैठक आणि चर्चा होणार आहे. महापालिकेच्या आगामी निवडणुकीत नव्या चेहऱ्यांना संधी देण्याबाबतही चर्चा होणार आहे. यासोबतच इतर पक्षातील अनेक पदाधिकारी आणि कार्यकर्त्यांनाही मनसेत प्रवेश दिला जाणार आहे.
तयारीसाठी पदाधिकारी जाणार पुढ - पक्षप्रमुख राज ठाकरे यांच्या या दौऱ्यासाठी पक्षाचे प्रवक्ते संदीप देशपांडे, ठाणे जिल्हाध्यक्ष अविनाश जाधव, प्रदेश उपाध्यक्ष आनंद अंबडवार यांच्यासह मनसेचे ज्येष्ठ पदाधिकारी चार दिवस अगोदर नियोजित ठिकणी येथे पोहोचणार आहेत. तिथे पक्षप्रमुख राज ठाकरे यांच्या नेतृत्वाची आणि त्यांच्या प्रस्तावित दौऱ्यासाठी सर्व प्रकारची तयारी केली जाणार आहे.
