मुंबई - औरंगाबादमध्ये मराठवाडा मुक्ती संग्रामाच्या काल (17 सप्टेंबर रोजी) झालेल्या कार्यक्रमात मंचावर उपस्थित असलेल्या भाजप नेत्यांचा भावी सहकारी म्हणून मुख्यमंत्र्यांनी उच्चार केला. त्यानंतर राजकीय वातावरण ढवळून निघाले आहे. मुख्यमंत्र्यांच्या वक्तव्यानंतर राजकीय वर्तुळात अनेक तर्क-वितर्क लावले जात आहेत. त्यानंतर आज शिवसेनेचे खासदार संजय राऊत यांनी मुख्यमंत्र्यांची वर्षा या निवासस्थानी भेट घेतली. या दोन्ही नेत्यांमध्ये जवळपास एक तास चर्चा झाली असून मुख्यमंत्र्यांनी केलेल्या वक्तव्याबाबत राजकीय वर्तुळात उमटलेल्या पाडसादाबाबत संजय राऊत यांनी मुख्यमंत्र्यांशी चर्चा केल्याची माहिती आहे.
या भेटीनंतर प्रसारमाध्यमांशी संवाद साधताना सावध भूमिका घेत महाविकास आघाडी सरकारला कोणताही धोका नाही. अजून पुढील पंचवीस वर्ष आघाडी सरकारच सत्तेत राहील, असं वक्तव्य संजय राऊत यांनी केले. तसेच वर्षा निवासस्थानी प्रतिष्ठापणा केलेल्या बाप्पाचे दर्शन घ्यायला आपण आलो आहोत. तसेच मुख्यमंत्र्यांसोबत झालेल्या खासगी चर्चा प्रसारमाध्यमांना का सांगू? असंही यावेळी राऊत प्रसारमाध्यमांना म्हणाले.
हे ही वाचा - नात्याला काळिमा; ४२ वर्षीय नराधम मामाने केला ६ वर्षीय अल्पवयीन भाचीवर बलात्कार
मुख्यमंत्र्यांच्या वक्तव्यानंतर काँग्रेस, राष्ट्रवादीमध्ये नाराजीचा सूर -
मुख्यमंत्री उद्धव ठाकरे यांनी भारतीय जनता पक्षाच्या नेत्यांना भावी सहकारी म्हटल्यामुळे आघाडी सरकारमध्ये सामील असलेले काँग्रेस आणि राष्ट्रवादी काँग्रेसच्या नेत्यांनी नाराजीचा सूर उमटला आहे. मात्र अद्याप दोन्ही पक्षाच्या एकही नेत्यांनी थेट याबाबत नाराजी व्यक्त केली नसली तरी, दोन्ही पक्षाच्या नेत्यांमध्ये दबक्या आवाजात मुख्यमंत्र्यांच्या वक्तव्याबाबत नाराजी असल्याचे सांगितले जातंय. एकाच मंचावर सर्व पक्षाचे नेते मंडळी उपस्थित असल्यास अशा प्रकारची वक्तव्य केली जातात, अशी सारवासारव राष्ट्रवादी काँग्रेसचे प्रदेशाध्यक्ष जयंत पाटील यांनी केली आहे.
हे ही वाचा - 'ज्यांना पतंग उडवायची, त्यांनी उडवावी'! अखेर संजय राऊतांनी चर्चेला दिला पूर्णविराम
