मुंबई - 26 नोव्हेंबर 2008 च्या मुंबईवर झालेल्या दहशतवादी हल्ल्याला यावेळेस 12 वर्षे पूर्ण होत आहेत. या दहशतवादी हल्ल्यात 197 निष्पाप नागरिकांचा जीव गेला होता. तर, 300 हून अधिक जण जखमी झाले होते. या हल्ल्यात मृत्यू झालेल्या नागरिकांमध्ये केवळ भारतीय नाही तर परदेशी नागरिकांचाही समावेश होता. या आत्मघाती हल्ल्यात पाकिस्तानमधून आलेल्या 10 पैकीं 9 दहशतवाद्यांना भारतीय सुरक्षा यंत्रणांनी कंठस्नान घातले होते. या कारवाईमध्ये अजमल कसाब हा एकमेव दहशतवादी जिवंत पकडला होता. पाहुयात 'ई टीव्ही भारत'चा सविस्तर रिपोर्ट...
- या 10 ठिकाणी झाले हल्ले
26 नोव्हेंबर 2008 रोजी मुंबईत दाखल झालेल्या दहशतवाद्यांनी मुंबईतील 10 ठिकाणी हल्ले केले होते. दक्षिण मुंबईतील छत्रपती शिवाजी महाराज टर्मिनस, ताज हॉटेल, ट्रायडंट हॉटेल, कामा हॉस्पिटल, नरीमन हाऊस, मेट्रो सिनेमा, टाइम्स ऑफ इंडिया इमारतीच्या मागच्या गल्लीत देखील हा हल्ला घडवण्यात आला होता. याबरोबरच विलेपार्ले परिसरात एका टॅक्सीमध्ये बॉम्बस्फोट घडवण्यात आला होता.
26 नोव्हेंबरच्या दिवशी रात्री आठ वाजता मुंबईत दाखल झालेले 10 दहशतवादी हे वेगवेगळ्या गटात विखुरले होते. यात दोघांकडे मोठ्या प्रमाणात शस्त्र, दारूगोळा व खाण्यापिण्याचे सामान होते. मुंबईतील ताज हॉटेल, ट्रायडंट हॉटेल, नरीमन हाऊस, छत्रपति शिवाजी महाराज टर्मिनस, विलेपार्ले अशा ठिकाणी गेलेल्या दहशतवाद्यांचा सामना करण्यासाठी मुंबई पोलिसांनी जीवाची बाजी लावली होती. यामध्ये मुंबई पोलिसांच्या 18 जवानांना वीरमरण आले होते. हल्ला करणाऱ्या दहशतवाद्यांचा बिमोड करण्यासाठी 400 लष्कर कमांडो, 300 एनएसजी कमांडो तसेच 100 मार्कोस कमांडो हे घटनास्थळी पाठवण्यात आले होते.
- या देशातील नागरिकांचा झाला मृत्यू
दहशतवादी हल्ल्यात तब्बल 178 भारतीय नागरिकांचा मृत्यू झाला होता. यात अमेरिकेच्या 4 नागरिकांचा मृत्यू झाला होता. यात ऑस्ट्रेलियाचे 4, कॅनडा देशातील 3 नागरिक, जर्मनीचे 3 नागरिक, इस्त्राईलच्या 2 नागरिकांना यामध्ये आपले प्राण गमवावे लागले होते. तसेच फ्रान्सच्या 2, ब्रिटन, सायप्रस, इटली, जपान, मॉरिशस, मेक्सिको, सिंगापूर, थायलंड, नेदरलँडच्या प्रत्येकी एका नागरिकांचा या हल्ल्यात मारला होता.
- 26/11 च्या हल्ल्यानंतर आजची मुंबईच्या सुरक्षेची स्थिती
देशातील आर्थिक राजधानी असलेले मुंबई शहर नेहमीच दहशतवादी हल्ल्यांच्या निशाण्यावर सतत राहिले आहे. याला अनुसरून मुंबईमध्ये नेहमीच हाय अलर्टवर पोलीस यंत्रणा काम करत असतात. तर, मुंबई शहराबद्दल बोलायचं झालं तर मुंबईची लोकसंख्या ही जवळपास 1 कोटी 84 लाखांच्या आसपास आहे. मुंबई शहराच्या सुरक्षेसाठी आजच्या घडीला 42 हजार पोलिसांचा फौजफाटा हा उपलब्ध आहे.
- मुंबईत 5500 सीसीटीव्हीचे जाळे -
26/11 च्या दहशतवादी हल्ल्यानंतर मुंबईच्या सुरक्षेसाठी अमुलाग्र बदल करण्यात आले आहेत. मुंबईतल्या कुठल्याही भागात जर एखादी संशयास्पद हालचाली होत असेल, किंवा एखादा गुन्हा घडत असेल तर त्यावर अंकुश ठेवण्यासाठी , आरोपींचा शोध घेण्यासाठी मुंबई शहरात 5500 सीसीटीव्ही कॅमेऱ्यांचे जाळे उभारण्यात आले आहे.
- 26/11 हल्ल्यानंतर पोलीस खात्यात मोठे बदल
या शहराची सुरक्षा ठेवण्यासाठी मुंबई पोलीस नेहमी डोळ्यात तेल घालून काम करत असतात. मुंबईमध्ये सध्या 94 पोलीस ठाणी असून, 102 ट्राफिक पोलिसांच्या चौक्या मुंबई शहरात आहेत. मुंबई पोलिसांकडे सध्या 3505 हॅच बॅक, एसयूव्ही व मोटरसायकल्स अशी वाहने आहेत. तसेच मुंबईला लागलेल्या समुद्र किनाऱ्याच्या सुरक्षेसाठी 32 स्पीड गण बोट मुंबई पोलिसांकडे सध्या उपलब्ध आहेत. जर, हेलिकॉप्टरबद्दल बोलायचं झालं तर मुंबई पोलिसांकडे 5 हेलिकॉप्टरचा ताफा हा सध्याच्या परिस्थितीत असून, बॉम्ब शोधक व नाशक पथकात 52 श्वान मुंबई शहराच्या सुरक्षेसाठी तैनात करण्यात आले आहेत.
26/11 च्या हल्ल्यानंतर मुंबई शहराच्या सुरक्षेत आमूलाग्र बदल करण्यात आले आहेत. मुंबई पोलिसांना अत्याधुनिक शस्त्रही पुरवण्यात आली आहेत. सदर मुंबई पोलीस खात्यामध्ये लोकल पोलीस, स्पेशल युनिट सर्विस, क्राइम ब्रँच, सायबर सेल, कमांडो फोर्स, डिटेक्शन युनिट, अँटी टेररिस्ट स्कॉड, ट्राफिक पोलीस, सोशल सर्विस सेल, नारकोटिक्स सेल, वायरलेस सेल, स्पेशल ब्रँच, इंटेलिजन्स युनिट, इकॉनोमिक ऑफेन्स विंग क्विक रिस्पॉन्स टीम, फोर्स वन सारखी पोलीस सुरक्षा व्यवस्था मुंबईत आहे.
- वेळोवेळी प्रतिबंधात्मक कारवाई
देशाचे आर्थिक शहर असल्यामुळे मुंबई शहरामध्ये नेहमी सतर्कता बाळगली जाते. प्रतिबंधात्मक कारवाई दरम्यान मुंबईमध्ये वेगवेगळ्या ठिकाणी संचारबंदी जाहीर केली जाते. काही विशिष्ट ठिकाणी यात खास करून बीएआरसी, एचपी रिफायनरी, बीपी रिफायनरी, मुंबई आंतरराष्ट्रीय विमानतळ, मंत्रालय व इतर संवेदनशील परिसरामध्ये ड्रोनसारख्या गोष्टींच्या वापरावर बंदी घालण्यात आली आहे.
- हे प्रमुख पोलीस अधिकारी दहशतवाद्यांशी लढताना झाले शहीद-
दहशतवाद प्रतिबंधक विभागाचे प्रमुख हेमंत करकरे, अतिरिक्त पोलीस आयुक्त अशोक कामटे, एनकाउंटर स्पेशलिस्ट विजय साळसकर, एन. एस. जी कमांडो अधिकारी मेजर संदीप उन्नीकृष्णन हे प्रमुख अधिकाऱयांना वीरमरण आले.
हेही वाचा - ईटीव्ही भारत विशेष : 26/11 मुंबई हल्ल्यातील साक्षीदार छोटूला काहीतरी सांगायचंय !
हेही वाचा - 26/11 मुंबई हल्ल्यातून वाचलेल्या तरुणीची मदतीसाठी उच्च न्यायालयात धाव
