मुख्यमंत्री-उपमुख्यमंत्र्याकडून शेतकऱ्यांची चेष्टा.. मात्र ज्यांना शेती कळत नाही त्यांच्याकडून मदत - राजू शेट्टी

मुख्यमंत्री-उपमुख्यमंत्री यांनी शेतकऱ्यांची चेष्टा चालवली आहे. ज्यांना शेती कळत नाही त्यांनी मदत केली, मात्र ज्यांना शेती कळते त्यांनी मदत देण्यास टाळाटाळ केली. असा टोला माजी खासदार व स्वाभिमानी शेतकरी संघटनेचे अध्यक्ष राजू शेट्टी यांनी महाविकासआघाडी सरकारला लगावला.

कोल्हापूर - कोल्हापुरात आलेल्या महापुराच्या नुकसान भरपाईपासून पोल्ट्री धारक आणि शेतकऱ्यांना खड्या प्रमाणे बाजूला केले आहे. 13 मे 2015 च्या शासन निर्णयानुसार शेतकऱ्यांना मदत करण्याचा जीआर राज्य सरकारने जारी केला आहे. त्यामुळे मुख्यमंत्री-उपमुख्यमंत्री यांनी शेतकऱ्यांची चेष्टा चालवली आहे. ज्यांना शेती कळत नाही त्यांनी मदत केली, मात्र ज्यांना शेती कळते त्यांनी मदत देण्यास टाळाटाळ केली. असा टोला माजी खासदार व स्वाभिमानी शेतकरी संघटनेचे अध्यक्ष राजू शेट्टी यांनी महाविकासआघाडी सरकारला लगावला. दरम्यान, या विविध मागण्यांसाठी 23 ऑगस्ट रोजी कोल्हापूर जिल्हाधिकारी कार्यालयावर मोर्चा काढून पुढील निर्णय जाहीर करू, असा इशारा राजू शेट्टी यांनी महाविकास आघाडी सरकारला दिला आहे.

माजी खासदार राजू शेट्टी पुढे म्हणाले, कोल्हापूर जिल्ह्यात आलेल्या महापुराला अनेक कारणे आहेत. तापमान वाढ, नद्यांची पाणी धारण करण्याची क्षमता, नद्यांवर बांधलेले पूल, रस्त्यावर टाकलेले भराव अशी बरीच कारणे कोल्हापूर आणि सांगली जिल्ह्याला येणाऱ्या महापुराची आहेत. राज्य सरकारने दरवर्षी मदत जाहीर करण्यापेक्षा त्यावर कायमस्वरूपी उपाय योजना करण्यासाठी प्रयत्न करावेत. अशी मागणी शेट्टी यांनी व्यक्त केली.

राज्य सरकारने कर्नाटक सरकारशी समन्वय साधावा. दोन राज्यांच्या वादात शेतकऱ्यांचा बळी का? असा सवाल कर्नाटक राज्याला देखील करणार आहोत. याबाबत बेळगावच्या जिल्हाधिकार्‍यांना लवकरच भेटणार आहोत. यंदाच्या महापुरात शेतकऱ्यांचे प्रचंड नुकसान झाले आहे. या नुकसानीतून सावरण्यासाठी राज्य सरकार खंबीरपणे उभे राहील असे वाटलं होते. मात्र मुख्यमंत्री उद्धव ठाकरे व उपमुख्यमंत्री अजित पवार यांनी केवळ आश्वासन देण्यापलीकडे काहीही केले नाही. 13 मे 2015 च्या शासन निर्णयानुसार यंदाच्या महापुरात नुकसानग्रस्त शेतकऱ्यांना मदत करण्याचे जाहीर केले. प्रतिगुंठा खरीप पिकांना ६८ रुपये आणि उसाला १३५ रुपये नुकसान भरपाई देण्याचे राज्य सरकारने ठरवले आहे. ही शेतकऱ्यांची चेष्टा चालवली आहे. असा घणाघात देखील राजू शेट्टी यांनी सरकारवर केला आहे.

दरम्यान, शेतकऱ्यांच्या विविध मागण्यांसाठी आणि पूरग्रस्तांच्या नुकसान भरपाईसाठी स्वाभिमानी शेतकरी संघटनेने एल्गार पुकारला आहे. 23 ऑगस्ट रोजी स्वाभिमानी शेतकरी संघटनेचा कोल्हापूर जिल्हाधिकारी कार्यालयावर भव्य मोर्चा निघणार आहे. हा मोर्चा दसरा चौकातून सुरू होणार आहे. पूरग्रस्त भागातील शेतकऱ्यांची संपूर्ण पीक कर्जमाफीसह पूर पट्ट्यातील घरांचे विनाअट संपूर्ण पुनर्वसन करण्याची प्रमुख मागणी या मोर्चाद्वारे करणार असल्याचे राजू शेट्टी यांनी सांगितले. दरम्यान ते २३ ऑगस्टपर्यंत सरकारने नुकसान भरपाईचे धोरण ठरवावे. अन्यथा पुढचा निर्णय मोर्चाच्या वेळीच जाहीर करू, असा इशारा राजू शेट्टी यांनी दिला आहे.

राजू शेट्टींच्या मागण्या -

• 2019 च्या शासन निर्णयानुसार पीक कर्ज माफ करावे.
• 103 पुलावर कमानी पूल बांधावे.
• पूर पट्ट्यातील घरांचे संपूर्ण पुनर्वसन करावे.
• भूस्खलन झालेल्या ठिकाणी नुकसान भरपाई आणि पुनर्वसन करावे.
• पूरग्रस्त विद्यार्थ्यांची संपूर्ण शैक्षणिक फी माफ करावी.
• पुराचे पाणी दुष्काळी भागात नेण्यासाठी प्रयत्न करावे.
• नियमित कर्ज भरणाऱ्या शेतकऱ्यांना अनुदान द्यावे.
• शेडनेट, ठिबक सिंचन, विद्युत मोटार याचं नुकसान झालेल्या शेतकऱ्यांना भरपाई मिळावी.