कोल्हापूर : खासदार युवराज संभाजीराजे छत्रपती यांना पोलंडच्या वतीने बेणे मेरीतो पुरस्कार देऊन सन्मानित केले जाणार आहे. पोलंड देशाच्या नागरिकांना अथवा पोलंड देशाला सहकार्य केलेल्या इतर देशातील नागरिकांना पोलंडच्या परराष्ट्र मंत्रालयातर्फे हा पुरस्कार प्रदान केला जातो. हा पुरस्कार 26 एप्रिल रोजी प्रदान करण्यात येणार आहे. दुसऱ्या महायुद्धादरम्यान पोलंडच्या 5000 निर्वासित नागरिकांना कोल्हापूरच्या छत्रपती घराण्याने आसरा दिला होता. या नागरिकांसाठी वळीवडे येथे मोठा कॅम्प उभारण्यात आला होता. त्यामुळे आजही पोलंड आणि कोल्हापूरातील छत्रपती घराण्याचे जिव्हाळ्याचे संबंध आहेत.
26 एप्रिल 2022 रोजी नवी दिल्लीतील पोलिश दूतावासात कार्यक्रम होणार - भारत व पोलंड या दोन्ही राष्ट्रांमधील हा ऐतिहासिक बंध पुन्हा जोपासण्यासाठी खासदार छत्रपती संभाजीराजे यांनी प्रयत्न केले. त्याचा गौरव करण्यासाठी आणि त्यांच्या माध्यमातून कोल्हापूरच्या जनतेचाही सन्मान करण्यासाठी झ्बिग्नीव राऊ यांच्या हस्ते त्यांना ‘द बेने मेरिटो’ हा सन्मान प्रदान करण्यात येत आहे. पोलंड प्रजासत्ताकचे परराष्ट्र व्यवहार मंत्री यांच्या उपस्थितीत मंगळवार, 26 एप्रिल 2022 रोजी नवी दिल्लीतील पोलिश दूतावासात हा कार्यक्रम होणार आहे.
दोन वर्षांपूर्वी कोल्हापूरात झाला होता भव्य कार्यक्रम : 14 सप्टेंबर 2019 रोजी झालेल्या या कार्यक्रमात पोलंडचे उपपरराष्ट्र मंत्री मार्सिन प्रझिडाक आणि भारतातील पोलंडचे राजदूत अॅडम बुराकोव्स्की यांच्या हस्ते 1942 ते 1949 या काळात येथे वास्तव्य करणाऱ्या या पोलिश कुटुंबांच्या आणि नागरिकांच्या स्मरणार्थ एक स्मृतीस्तंभाचे अनावरण आणि संग्रहालयाची पायाभरणी करण्यात आली होती. यावेळी बोलताना खासदार संभाजीराजे म्हणाले होते की, “ज्यावेळी जग युद्धाने उध्वस्त झाले होते, युरोप उद्ध्वस्त झाला होता आणि भारताचा काही भाग भयंकर दुष्काळाच्या खाईत होता, तेव्हा कोल्हापूरच्या छत्रपतींनी या पोलिश कुटुंबांना मानवतावादी आधारावर दत्तक घेतले. आम्हाला ही भावना स्मारक आणि संग्रहालयाच्या माध्यमातून जिवंत ठेवायची आहे. ज्यामुळे इंडो-पोलिश संबंध अधिक दृढ होतील.” असेही संभाजीराजे म्हणाले होते.
