ठाणे - कल्याण पश्चिमेतील गांधारी नजीक परिसरात एका घरामध्ये दुर्मिळ शॅमेलीयन प्रजातीचा सरडा आढळून आला. संबंधितानी वर्ल्ड रेस्क्यू हेल्पलाइनला ही माहिती दिली. यानंतर वॉर फाउंडेशन या प्राणी मित्र संघटनेच्या कार्यकर्त्या फाल्गुनी दयाल यांनी तातडीने घटनास्थळी दाखल होऊन सरड्याला पकडले आणि नैसर्गिक अधिवासात सोडले.
शॅमेलीयन सरडा नामशेष होण्याच्या मार्गावर
सरड्याची शॅमेलीयन ही दुर्मिळ प्रजात असून निसर्ग साखळीत त्यांचे महत्त्वाचे स्थान आहे. विशेष म्हणजे शॅमेलीय सरड्याची प्रजाती नामशेष होत चालली आहे. त्यातच आज या शॅमेलीयन सरड्याची प्रजात कल्याणात आढळल्याने ही दुर्मिळ घटना असून रंग बदलण्यात हे सरडे तरबेज असल्याचेही माहिती प्राणीमित्र फाल्गुनी हिने दिली आहे.
शॅमेलीयन सरड्या विषयी उपयुक्त माहिती
किडे व फुलपाखरू, असे प्रामुख्याने खाद्य असलेल्या या सरडा प्रजातीला चपळ समजले जात असले तरी हिरवा सरडा मात्र संथ व अलगद चालतो. गवताच्या रंगरूपात एकरूप होत असल्याने तो नजरेला येत नाही. त्वचेखाली असलेल्या रंगद्रव्यामुळे रंग बदलण्यात माहीर असणारा सरडा, असे या प्रजातीला ओळखले जाते. वातावरणानुसार रंग बदलत जाणारे सरडे अनेक असले तरी हा हिरव्या रंगाचा सरडा दुर्मिळ समजला जातो.
हेही वाचा - धक्कादायक..! 400 रुपयाच्या वादातून मित्रांमध्ये झटापट; थरार सीसीटीव्हीत कैद
