अमरावती - देशात वाढलेली महागाई तसेच ईडीच्या माध्यमातून दबावतंत्राविरोधात देशव्यापी आंदोलन करण्यात येत आहे. अमरावतीतही शहर काँग्रेसच्या वतीन राजकमल चौक येथे केंद्र शासनाविरुद्ध निदर्शने करण्यात आली. भाजपचे अखेरचे काही दिवस सत्तेत शिल्लक राहिले असून, लवकरच देशात सत्ता परिवर्तन होईल, अशी आशा काँग्रेसने व्यक्त केली ( Congress Protest In Amravati ) आहे.
पंतप्रधानांविरोधात घोषणाबाजी - शहर काँग्रेसच्या वतीने राजकमल चौक येथे केंद्र शासनाविरोधात आंदोलन करताना पंतप्रधान नरेंद्र मोदी यांच्या विरोधात घोषणाबाजी केली. 2014 मध्ये सत्तेत आलेल्या पंतप्रधान नरेंद्र मोदी यांनी जनतेला दिलेले एकही आश्वासन पूर्ण केले नाही. देशभर महागाई वाढली असून, केवळ विशिष्ट उद्योगपतींनाच लाभ मिळत आहे. देशातील जनता त्रस्त झाल्याचा आरोप यावेळी काँग्रेसच्या वतीने करण्यात आला. आता भाजपचे अखेरचे काही दिवस सत्तेत शिल्लक राहिले असून, लवकरच देशात सत्ता परिवर्तन होईल, अशी आशा यावेळी काँग्रेसचे प्रदेश प्रवक्ता दिलीप एडतकर यांनी माध्यमांशी बोलताना व्यक्त केली.
आंदोलकांना पोलिसांनी घेतले ताब्यात - राजकमल चौक येथे काँग्रेस कार्यकर्त्यांच्या वतीने केंद्र शासनाविरोधात निषेध नोंदविण्यात आल्यावर पोलिसांनी आंदोलकांना ताब्यात घेतलं. काँग्रेसचे शहर अध्यक्ष बबलू शेखावत यांच्यासह शहराचे माजी महापौर मिलिंद शिंदे विलास इंगोले यांच्यासह दिलीप एडतकर, किशोर बोरकर सचिन जवंजाळ, संकेत कुलट, अंजली ठाकरे, सुजाता झाडे यांच्यासह काँग्रेसचे अनेक पदाधिकाऱ्यांनी कार्यकर्ते हे आंदोलनात सहभागी होते.
हेही वाचा - congress agitation : महागाईच्या विरोधात काँग्रेसचे देशव्यापी आंदोलन सुरू
