मुंबई – भारतीय रिझर्व्ह बँकेचे माजी गव्हर्नर रघुराम राजन यांनी आर्थिक धोरणाबाबत भारत सरकारला सावध केले आहे. आरबीआयकडून ताळेबंदाचा विस्तार करण्यात येत आहे. अर्थव्यवस्था मंदावलेली असताना अधिक चलनाची तरलता पुरवून आरबीआय सरकारचे कर्ज खरेदी करत आहे. त्याची किंमत ही चुकवावी लागणार असल्याचा इशारा रघुराम राजन यांनी दिला. ते डीबीएस बँकेच्या परिषदेत बोलत होते.
रघुराम राजन हे सातत्याने केंद्र सरकार आणि आरबीआयच्या आर्थिक धोरणातील त्रुटी दाखवून देतात. ते बँकेच्या परिषदेत म्हणाले, की केंद्रीय मध्यवर्ती बँकेचे पतधोरण हा शेवटचा पर्याय होवू शकत नाही. केंद्रीय बँकांकडून पतधोरणाचा रणनीतीसारखा वापर करण्यात येत आहे. जे लोक याला पाठिंबा देत आहेत, त्यांनी स्पष्ट लक्षात ठेवावे, की हा सोपा मार्ग नाही.
पुढे ते म्हणाले, की भारतासारख्या देशाच्या अर्थव्यवस्था खुल्या झाल्यानंतर कॉर्पोरेट क्षेत्राचे मोठे नुकसान होणार आहे. टाळेबंदीत झालेले नुकसान भरून निघणार नाही. हे नुकसान वित्तीय क्षेत्राकडे हस्तांतरित करण्यात येईल. त्यांचा बँकांसह वित्तीय संस्थांवर मोठा परिणाम होणार आहे. आपण अर्थव्यवस्था कोमामध्ये ठेवण्याचे व्यवस्थापन केले आहे. पण जेव्हा अर्थव्यवस्था जागी होईल, प्रत्येकजण बिछान्यातून झोपेतून उठून चालेल, अशी आशा बाळगणे अतिआशावाद आहे, असे त्यांनी मत व्यक्त केले.
दरम्यान, कोरोनाच्या संकटात दिलासा देण्यासाठी आरबीआयने सातत्याने रेपो दरात कपात केली आहे. तसेच आरबीआयने विविध सरकारी रोखे विकत घेत भांडवली बाजारात चलनाची तरलता उपलब्ध करून दिली आहे.
