नवी दिल्ली - केंद्र सरकारने प्रदूषण पातळी कमी करण्यासाठी बीएस-६ या प्रकारचे इंजिन वाहन कंपन्यांना बंधनकारक केले आहे. त्याचा परिणाम देशात उत्पादित होणाऱ्या दुचाकींच्या किमतीवर होणार असल्याचे इंडिया यामाहा मोटरने (आयवायएम) म्हटले आहे. दुचाकींच्या किमती सुमारे १० ते १५ टक्क्यांनी वाढतील, असे यामाहाने म्हटले आहे.
दुचाकीसह स्कूटरमध्ये बीएस-६ इंजिन बसविण्यासाठी यामाहा कंपनीला रचनेत बदल करावे लागणार आहेत. यामधील यामाहाच्या दुचाकीसाठीचा पहिला टप्पा नोव्हेंबर २०१९ पासून सुरू होणार आहे. तर स्कूटरसाठीच्या पहिला टप्प्याचे काम जानेवारी २०२० मध्ये सुरू होणार आहे.
यामाहाची टीम ही कंपनीच्या बांधीलकीने काम करत आहे. केंद्र सरकारने एप्रिल २०२० ही बीएस-६ प्रदूषण मानकाचे वाहन बाजारात आणण्याची मुदत दिली आहे. त्यापूर्वीच यामाहाची वाहने बाजारात येतील, असा विश्वास कंपनीने व्यक्त केला आहे.
चारचाकीचे डिझेल वाहने २०२० नंतर बंद होणार-
मारुती सुझुकी आणि टाटा मोटर्सने २०२० नंतर डिझेल वाहने बंद करण्याचा निर्णय घेतला आहे. तसेच चारचाकी वाहनांच्या किमती वाढणार असल्याचेही चारचाकी कंपन्यांनी म्हटले आहे.
