नवी दिल्ली – केंद्र सरकारने देशाच्या सुरक्षिततेला धोका असल्याने 59 चिनी अ‌ॅपवर बंदी घातली आहे. यामध्ये टिकटॉकचाही समावेश आहे. भारताने बंदी लागू केल्यानंतर गुगलने प्ले स्टोअरवरून टिकटॉक अ‌ॅप हटविले आहे, तर अ‌ॅपल कंपनीने स्टोअरवरून टिकटॉक काढून टाकले आहे. त्यामुळे टिकटॉक कंपनीला मोठा फटका बसला आहे.
गुगल प्ले स्टोअरवर टिकटॉक सर्च केले असता अ‌ॅप तुमच्या देशात उपलब्ध नाही, असा संदेश वापरकर्त्याला दिसत आहे. असे असले तरी टिकटॉकने स्वत:हून प्ले स्टोअरवरून अ‌ॅप हटविल्याचे काही माध्यमांनी सूत्राच्या हवाल्याने म्हटले आहे. भारत सरकारने सोमवारी 59 चिनी अ‌ॅपवर बंदी लागू केली आहे. यामध्ये टिकटॉकचा, युसी ब्राऊझर यांचा समावेश आहे. या अ‌ॅपमुळे देशाची सार्वभौमता, एकता आणि सुरक्षिततेला धोका पोहोचत असल्याचे केंद्र सरकारने म्हटले आहे.
टिकटॉकने सरकारी नियमांचे पालन करण्याची प्रक्रिया करत असल्याचे म्हटले आहे. चीनसह कोणत्याही विदेशी सरकारला माहिती देण्यात नसल्याचा कंपनीने दावा केला आहे. प्रतिक्रिया व स्पष्टीकरण देण्याची संधी सरकारमधील भागीदारांना मिळावी, असे कंपनीच्या प्रमुख निखील गांधी यांनी म्हटले आहे.
दरम्यान, चीन व भारतामध्ये तणावाची स्थिती आहे. या कारणामुळे भारताने चीनची आर्थिक आणि डिजिटल माध्यमावरही नाकाबंदी करण्याचा प्रयत्न सुरू केला आहे. यापूर्वीही टिकटॉक कंपनी विविध कारणांमुळे वादाच्या भोवऱ्यात पडली होती. केंद्र सरकारने चिनी ॲप डाउनलोड करू नये, अशी भारतीय नागरिकांना सूचनाही केली होती. मात्र, प्रत्यक्षात आता बंदी लागू करण्यात आली आहे.
