वॉशिंग्टन - कोरोना महामारीने जागतिक अर्थव्यवस्थेची घसरण झाली आहे. त्यामुळे विकसनशील देशांना मोठ्या निधीची गरज लागणार असल्याचे आंतरराष्ट्रीय नाणेनिधीच्या प्रमख ख्रिस्टिलिना जॉर्जिव्हिया यांनी सांगितले. आपण मंदीत प्रवेश केला आहे, हे स्पष्ट आहे. ही मंदी २००९च्या जागतिक मंदीहून वाईट असेल, असा त्यांनी इशारा दिला आहे.
जागतिक अर्थव्यवस्था अचानक थांबल्याने विकसित होणाऱ्या बाजारपेठांना सुमारे २.५ लाख कोटी डॉलरची आवश्यकता आहे. अनेक देशांमधील स्त्रोत अपुरे आहेत, असे त्यांनी सांगितले. अनेक देशांवर कर्जाचा बोझा आहे, याकडेही ख्रिस्टिलिना जॉर्जिव्हिया यांनी लक्ष वेधले आहे.
हेही वाचा-कोरोनाशी लढा: अभय फिरोदिया ग्रुपकडून २५ कोटींची मदत जाहीर
जगभरातील ८० देश हे कमी उत्पन्न गटातील आहेत. या देशांनी आंतरराष्ट्रीय नाणेनिधीकडे आपत्कालीन निधीची मागणी केली आहे. आयएमएफच्या प्रमुखांनी व्हर्च्युअल बैठक घेतली आहे. सध्या आपत्कालीन निधी असलेला वाढवावा, अशी त्यांनी सदस्य देशांना विनंती केली आहे. अमेरिकेच्या संसदेने २.२ लाख कोटींचे आर्थिक पॅकेज मंजूर केले आहेत. त्याचे ख्रिस्टिलिना जॉर्जिव्हिया यांनी स्वागत केले आहे.
हेही वाचा-लॉक डाऊन : ई-कॉमर्स कंपन्यांचे अंशत: कामकाज सुरू, डिलिव्हरी मिळायला होणार उशीर
