यवतमाळ - पडीक जमीन म्हटले तर शेतीचे कोणतेही पीक घेणे जवळपास शक्य असते. मात्र, ' इच्छा तेथे मार्ग ' या उक्तीचा प्रत्यय आणत दारव्हा येथील तरुणाने पडीक जमिनीवर लघु उद्योग प्रकल्प साकारला आहे. आकाश चिरडे असे सुशिक्षित बेरोजगारांसमोर आदर्श निर्माण करणाऱ्या तरुणाचे नाव आहे. त्यांनी आपल्या शेतातील पडीक जमिनीवर फ्लाय अॅश वीट उद्योगाची उभारणी केली आहे.
दारव्हा येथील राजुरा रोडवरील शेतातील पडीक जमिनीचा योग्य उपयोग करण्याची योजना आकाश चिरडे यांनी आखली. त्यांचे एमए, एमकॉम, बी एड. पर्यंत शिक्षण पूर्ण झाले. मात्र नोकरीच्या मागे न लागता एखादा उद्योग उभारायचा हा विचार आकाश यांच्या मनात घर करून बसला होता. त्यांनी जिल्ह्यातील विविध लघु उद्योगाची माहिती संकलित केली. दारव्हा परिसरात काय करता येईल, या दिशेने अभ्यास केला.
आकाश यांना ध्येपूर्तीसाठी अखेर मार्ग सापडला. त्यांनी फ्लाय अॅश वीट निर्मितीचा लघु उद्योग उभारण्याचा संकल्प केला. त्यासाठी ग्रामीण स्वयंरोजगार प्रशिक्षण संस्थेचे विशेष प्रशिक्षण घेतले. सरकारच्या पी. एम. ई. जी. पी. योजनेअंतर्गत विदर्भ कोकण ग्रामीण बँक, दारव्हा शाखेच्या सहकार्याने भांडवल उभारले.
हेही वाचा-गॅस सिलिंडरच्या किमती पुढील महिन्यात कमी होण्याची शक्यता - धर्मेंद्र प्रधान
भारतीय रिझर्व बँक व जिल्हा उद्योग केंद्राच्या वरिष्ठ अधिकाऱ्यांचे मार्गदर्शन घेतले. राज्यातील प्रकल्पांना भेटी देत बारकावे समजून घेतले. प्रचंड मेहनत घेवून नियोजपूर्वक श्री दत्त इंडस्ट्रीज या नावाने फ्लाय अॅश विट निर्मितीचा व्यवसाय सुरू केला. अखेर त्यांच्या उद्योगाने आज चांगलीच भरारी घेतली आहे.
फ्लाय अॅश विटेचे असे आहेत फायदे-
- फ्लाय अॅश विटमुळे घर बांधकामात खर्चाची बचत होत असल्याचा त्यांचा दावा आहे.
- वीट निर्मितीसाठी आवश्यक कच्चा माल पॉवर प्लांट मधून आणला जातो.
- ही वीट पर्यावरणपूरक असून बांधकामात पाण्याची बचत होते.
- विशेष म्हणजे फ्लाय अॅश वीट सरकारमान्य आहे.
- विटेला बाजारात चांगली मागणी आहे.पडीक जमिनीवर फुलवला लघु उद्योगाचा 'बहर'
हेही वाचा-'परवडणाऱ्या दरातील घरांसाठी बांधकाम विकसकांनी म्हाडाबरोबर भागीदारी करावी'
या उद्योगाच्या माध्यमातून काही तरुणांना रोजगारदेखील उपलब्ध झाला आहे. आकाश यांनी उद्योगासाठी कुटुंबातील रमेशराव चिरडे व वडील माजी नगराध्यक्ष अशोकराव चिरडे यांचे नैतिक पाठबळ मिळाल्याचे सांगितले. सुशिक्षित तरुणांनी निराश न होता उद्योजकतेची कास धरावी, याचा वस्तूपाठच आकाश या तरुणाने घालून दिला आहे.
