जम्मू - जम्मूच्या नागनाड-चिमर भागात 3 दहशतवाद्यांना कंठस्नान घालण्यात जम्मू-काश्मिर पोलिसांना यश आले आहे. आज सकाळी काश्मिरमधील कुलगाम आणि जम्मूच्या चिमर भागात दहशतवादी असल्याची माहिती पोलिसांना मिळाली होती. त्यानुसार मोहीम आखून दहशतवाद्यांवर कारवाई करण्यात आली. मात्र, मारलेले दहशतवादी कुठल्या संघटनेचे होते, हे अद्याप समजू शकलेले नाही. या चकमकीबाबत माहिती काश्मिर पोलिसांनी दिली.
याआधी 13 जुलैला अनंतनाग जिल्ह्यात दोन अतिरेक्यांचा खात्मा करण्यात आला होता.
जून महिन्यात जम्मू काश्मिरात 48 दहशतवाद्यांचा खात्मा -
जम्मू काश्मीर केंद्रशासित प्रदेशामध्ये जून महिन्यात 48 दहशतवाद्यांना ठार मारण्यात आल्याची माहीती पोलीस महासंचालक दिलबाग सिंग यांनी दिली. पोलीस महासंचालक दिलबाग सिंग यांनी पुंछ जिल्ह्यात पत्रकारांशी संवाद साधला. सुरक्षा दलांनी या महिन्यात विविध दहशतवादी विरोधी कारवाया केल्या. त्यात 48 दहशतवादी ठार झाले, ठार झालेल्यांमध्ये अनेक कमांडरचाही सामवेश आहे. 2020 मध्ये आत्तापर्यंत 128 दहशतवाद्यांचा खात्मा करण्यात आला.
