नागपुर - कौटुंबिक वादातून एका व्यक्तीने स्वतःच्या ९ महिन्यांच्या चिमुकलीचा निर्घृण खून केला, आणि त्यांनतर स्वतःदेखील आत्महत्या करण्याचा प्रयत्न केला आहे. अलविना शेख असे या दुर्दैवी बाळाचे नाव आहे. तर सोनू शेख असे आरोपी बापाचे नाव आहे. त्याला उपचारासाठी रुग्णालयात दाखल करण्यात आले आहे.
याबाबत मिळालेल्या माहितीनुसार, नागपूर शहरातील सक्करदारा पोलीस ठाण्याच्या हद्दीतील भांडेप्लॉट चौकात असलेल्या शिवशंकर मठाशेजारील एका ड्रम मध्ये लहान बाळाचा मृतदेह असल्याची पोलिसांना मिळाली होती. मिळालेल्या माहितीच्या आधारे पोलीस घटनास्थळी दाखल झाले, तेव्हा नऊ महिन्याच्या अलविनाचा मृतदेह पाण्याने भरलेला ड्रम मध्ये तरंगत होता. त्याच्या शेजारीच सोनू शेख हा जखमी अवस्थेत पडलेला असल्याने त्या भागात राहणाऱ्या नागरिकांनी त्याला रुग्णालयात उपचारासाठी दाखल केले होते.
पोलिसांनी केलेल्या प्राथमिक तपासात अलविनाचे वडील सोनू शेख यानेच स्वतःच्या लेकीची पाण्यात बुडवून हत्या केल्यानंतर, स्वतःदेखील काचेच्या बाटलीने आपल्या गळ्यावर वार करून आत्महत्येचा प्रयत्न केल्याची माहिती पुढे आली.
आरोपी सोनू हा खासगी गाडी चालक आहे. मात्र सध्या काम मिळत नसल्याने तो आर्थिक अडचणीत सापडला होता. त्यामुळे पती-पत्नीमध्ये वादावादी होत होती. आजसुद्धा याच मुद्यावरून दोघांमध्ये भांडण झाले त्यातून आरोपीने हे कृत्य केले. सक्करदारा पोलिसांनी याप्रकरणी गुन्हा नोंद करून तपास सुरू केला आहे.
