मुंबई - शेतकरी, कामगार आणि सर्वसामान्य जनतेच्या विरोधात केंद्र सरकारचे धोरण असून त्याविरोधात सेंटर ऑफ इंडियन ट्रेड युनियनसह इतर केंद्रीय कामगार संघटनांनी उद्या (बुधवारी) देशव्यापी आंदोलन पुकारले आहे. या आंदोलनात राज्यातील हजारो अंगणवाडी कर्मचारी सहभागी होणार आहेत.
केंद्र सरकारच्या कृषीविषयक धोरणाच्या विरोधात देशभरात संतापाचे वातावरण सुरू असतानाच विविध क्षेत्रातील कामगार संघटनांनी देशभरात बुधवारी केंद्र सरकारच्या विरोधात आंदोलन पुकारले आहे. यात राज्यातील महाराष्ट्र राज्य अंगणवाडी कर्मचारी कृती समितीचे हजारो कर्मचारी सहभागी होणार आहेत. यात राज्यातील प्रत्येक जिल्ह्यांच्या प्रमुख ठिकाणी अंगणवाडी सेविका, मिनी अंगणवाडी सेविका आणि मदतनीस जमून केंद्र सरकारचा निषेध करणार आहेत.
अंगणवाडी कर्मचाऱ्यांना कोविड तसेच माझे कुटुंब, माझी जबाबदारी मोहिमेतून मुक्त करण्यात यावे, अंगणवाडीचे नियमित काम व आहार यावर लक्ष केंद्रित करावे, अंगणवाडी कर्मचाऱ्यांना अत्यावश्यक सेवेचे ओळखपत्र व ई-पास देण्यात यावेत, कोरोनाच्या भीतीमुळे खासगी घरमालक त्यांच्या घरात भरणाऱ्या अंगणवाडीत कर्मचारी व लाभार्थ्यांना प्रवेश देत नसल्याने अंगणवाड्यांना स्वतंत्र जागा उपलब्ध करून द्याव्यात.
आर्थिक मंदीमुळे अनेक पालकांच्या रोजगार व मिळकतीवर परिणाम झाला आहे. त्यामुळे महिला व बालकांच्या कुपोषणात वाढ होत आहे. तरी लाभार्थ्यांना अंडी, दूध, फळे व एक वेळचा ठोस ताजा आहार देण्यात यावा व त्यासाठी निधीत भरीव वाढ करावी, आदी मागण्याही करणार असल्याची माहिती अंगणवाडी कृती समितीकडून देण्यात आली.
