नवी दिल्ली - भारतीय हवाई दलाने बालाकोट येथील 'जैश'च्या तळांवर केलेल्या हल्ल्यात ठार झालेल्यांच्या आकडेवारीवर प्रश्न विचारले जात आहेत. या पार्श्वभूमीवर आज भारतीय हवाई दलाचे प्रमुख बी.एस. धनोआ यांनी पत्रकार परिषद घेतली. लक्ष्यावर प्रहार झाला की नाही हे पाहणे आमचे काम आहे. हल्ल्यात किती जण ठार झाले हे आम्ही पाहत नाही, ते काम सरकार करत असते, असे धनोआ यांनी यावेळी स्पष्ट केले.
पाकिस्तानच्या ताब्यातून विंग कमांडर अभिनंदन वर्धमान यांची सुटका झाल्यानंतर आज पहिल्यांदाच हवाई दलाने पत्रकार परिषद घेतली. आम्ही अचूक ठिकाणांवरच हल्ला केला आहे. जर आम्ही जंगलात बॉम्ब टाकले असते तर पाकिस्तानने यावर प्रतिक्रिया दिली असती का?, असा प्रतिप्रश्नही यावेळी त्यांनी उपस्थित केला. मिग-२१ सशक्त विमान आहे. ते सध्या अद्ययावत करण्यात आले आहे. शस्त्रास्त्रांनी हे विमान सज्ज असल्याचेही यावेळी धनोआ यांनी सांगितले. पाकिस्तानने या कारवाईत एफ-१६ विमानाचा वापर केला. याचा अर्थ ते आपल्याविरोधात या विमानांचा वापर करत आहेत, असेही धनोआंनी सांगितले.
पंतप्रधान मोदींच्या वक्तव्यावर धनोआंचे मौन -
पंतप्रधान मोदींनी नुकतेच दिल्लीतील एका कार्यक्रमात बोलताना म्हटले होते की, आपल्याकडे राफेल विमान असते तर परिणाम वेगळा झाला असता. पंतप्रधानांच्या या वक्तव्याविषयी धनोआ यांना प्रश्न विचारला असता ते म्हणाले की, आदरणीय पंतप्रधानांचे वक्तव्यावर मी प्रतिक्रिया देणार नाही.
आगामी सप्टेंबर महिन्यात भारताकडे राफेल विमाने येऊ शकतात, असेही धनोआ यांनी सांगितले. अभिनंदन परत आल्यामुळे आम्ही आनंदी आहोत. मात्र, मी राजकारणावर कुठलीच प्रतिक्रिया देऊ इच्छित नाही, असेही ते म्हणाले. अभिनंदन वैद्यकीयदृष्ट्या तंदुरुस्त झाल्यावरच ते आपल्या कार्यावर परततील असेही धनोआंनी स्पष्ट केले.
