नवी दिल्ली : कुस्ती महासंघाचे अध्यक्ष ब्रिजभूषण सिंह यांच्याविरोधात आंदोलन करणाऱ्या कुस्तीपटूंशी क्रीडामंत्री अनुराग ठाकूर यांची बैठक पार पडली. कुस्तीपंटूसोबत झालेली चर्चा ही सकारात्मक झाली असल्याचे केंद्रीय मंत्री अनुराग ठाकूर म्हणाले आहेत. या घटनेप्रकरणी 15 जूनपर्यंत आरोपपत्र दाखल केले जावे, अशी मागणी पैलवानांनी केली असल्याचेही ठाकूर म्हणाले. दरम्यान पैलवानांनी या बैठकीत 5 मागण्या ठेवल्या होत्या. त्यामध्ये ब्रिजभूषण यांना लवकर अटक करण्याची मागणी पुन्हा केली.
सरकारला पुन्हा इशारा : केंद्र सरकार आंदोलन करणाऱ्या पैलवांनासोबत पुन्हा चर्चा करण्यास तयार असल्याचा संदेश क्रीडा मंत्र्यांनी दिला होता. त्यानंतर कुस्तीपटूंनी सरकारची ऑफर स्वीकारत क्रीडामंत्री अनुराग ठाकूर यांच्या कार्यालयात भेट घेतली. पैलवानांच्यावतीने बजरंग पुनिया आणि साक्षी मलिक यांनी अनुराग ठाकूर यांची भेट घेतली. कुस्तीपटू आणि प्रशिक्षक तसेच क्रीडामंत्री अनुराग ठाकूर यांच्यामध्ये जवळपास 5 तास चर्चा झाली. यानंतर साक्षी मलिकने सांगितले की, 15 जूनपर्यंत आंगदोलन स्थगित केले जाणार आहे. ब्रिजभूषण शरण सिंह यांच्यावर कारवाई झाली नाही तर पुन्ही आंदोलन तीव्र करणार असल्याचा इशारा सरकारला दिला आहे.
काय म्हणाले क्रीडा मंत्री : पैलवानांनी सोबत झालेल्या बैठकीनंतर केंद्रीय क्रीडा मंत्री ठाकूर यांनी माध्यमांशी संवाद साधला. ठाकूर म्हणाले, ज्या खेळाडूंवर खटले आहेत त्यांचे खटले मागे घेण्याची मागणी केली गेली. याप्रकरणी १५ जूनपर्यंत आरोपपत्र दाखल व्हावे, अशी खेळाडूंची इच्छा असून तोपर्यंत ते कोणतेही आंदोलन करणार नाहीत. आम्ही सर्व विषयांवर खुल्या मनाने गांभीर्याने बोललो. सर्व खेळाडू आणि प्रशिक्षकांनी सकारात्मक संवाद साधला. कुस्ती महासंघाच्या निवडणुका 30 जूनपर्यंत घेण्याची मागणीही त्यांनी केली आहे.
15 जूनपर्यंत पोलिस तपास पूर्ण होईल, असे आश्वासन सरकारने दिले आहे. आम्ही सर्व पैलवानांवर दाखल केलेले गुन्हे मागे घेण्याची विनंती केली असून त्यांनी ती मान्य केली आहे. १५ जूनपर्यंत कारवाई न झाल्यास पुन्हा आंदोलन करू. - पैलवान बजरंग पुनिया
हेही वाचा -
